Монголчууд олон улсын агаарын тээврийн компаниуд дунд нислэгийн аюулгүй байдал, тансаг зэрэглэлийн бизнес аялалын нислэг, тохь тухтай орчин, гайхамшигт хоолны амтаараа дэлхийн олон сая жуулчдыг татдаг шилдэг нислэгийн компани “Qatar Airways”-ээр үйлчлүүлэх боломжтой болжээ.
Монгол Улс болон Катар улсын хоорондын “Агаарын харилцааны хэлэлцээр”-ийг Засгийн газрын хуралдаанаар эцэслэн баталлаа. Хэлэлцээр хүчин төгөлдөр болсноор хоёр улсын агаарын тээвэрлэгч компаниуд шууд болон коммерын хамтын ажиллагааны хүрээнд нислэг үйлдэх бөгөөд аялал жуулчлал, бизнес, худалдаа, эдийн засгийн харилцаа хөгжих өргөн боломж бий болж байгааг Иргэний Нисэхийн Ерөнхий Газар онцолж байна.
Монголын талаас “МИАТ” ТӨХК Зам, тээврийн хөгжлийн сайдын 2023 оны 2 дугаар сарын 6-ны өдрийн А/22 тушаалаар Улаанбаатар-Доха чиглэлд нислэг үйлдэх агаарын тээвэрлэгчээр томилогдоод байгаа юм. Ингэснээр Улаанбаатар хотоос Ойрх Дорнод, Хойд Африк, Булангийн орнууд руу зорчигч, ачаа тээвэрлэх боломжтой болж байна.
Ташрамд дурдахад, шилдэг нислэгийн компани “Катар Эйрвэйз” нь 2020 оны аялагч жуулчдын шагнал гардуулах ёслолоос гайхалтай таван шагналыг хүртсэн байдаг. ‘Шилдэг агаарын тээврийн компани’ -аар шалгарч, ‘Шилдэг холын тээврийн үйлчилгээ үзүүлэгч’, ‘Шилдэг бизнес ангилал’, ‘Ойрхи Дорнодын шилдэг агаарын тээврийн компани’ гэсэн ангилалд түрүүлсэн байдаг. Түүнчлэн олон улсын агаарын тээврийн компаниудын ‘Шилдэг нислэгийн хоол, ундаа’ ангилалд гайхамшигтай үйлчилгээгээрээ алдаршиж буй. Тэгвэл энэ бүх үйлчилгээг монголчууд авах боломж бүрджээ.
Өнөөдрийн байдлаар “Qatar Airways” нь 90 улсын 150 чиглэлд нислэг үйлддэг юм байна. 2022 онд тус компаниар 18.5 сая зорчигч үйлчлүүлж, 2021-2022 оны санхүүгийн жилд 5.6 тэрбум риал буюу 1.54 тэрбум ам.долларын цэвэр ашиг олж, дээд амжилт тогтоожээ.
Нөгөөтэйгүүр, Монгол Улс “Qatar Aeronavigation Academy”-тай хамтран ажиллах боломж бүрдэж байгаа аж. “Qatar Aeronavigation Academy” нь нисгэгч, нисэх онгоцны засвар үйлчилгээний инженер, нислэгийн удирдагч, цаг уурч, нисэх онгоцны буудлын ашиглалтын удирдлагын ажилтан, аюулгүй байдал, цагаачлалын ажилтнуудад зориулсан, мөн IDP IELTS-ийн сургалт зохион байгуулдаг юм байна.
