Соёл урлаг бол дэлхийн эдийн засгийн хөгжилд дорвитой хувь нэмэр оруулж буй чухал салбар билээ. Өдгөө дэлхийн дахинд “Бүтээлч үйлдвэрлэл”, “Бүтээлч эдийн засаг” гэж нэрлэгдээд буй соёл урлагийн салбарын нийгэм, эдийн засагт оруулах хувь нэмрийг орчин үед ид яригдаж буй аж үйлдвэржилтийн салбараас ч илүү чухалд тооцон үнэлж, хөрөнгө зарж, хөгжүүлэх бодлого баримтлан ажиллаж байгаа улс орон цөөнгүй байна.
Тэгвэл манай улсад авьяас билэг, ур чадвар дээр суурилж, шинийг сэтгэж, бүтээн туурвих, үйл ажиллагаа явуулдаг энэ чухал салбарт мэргэжлийн урлагийн боловсон хүчнийг бэлтгэдэг толгой байгууллага бол СУИС юм.
Соёл урлагийн их сургууль хаврын сарыг халуун дулаан уур амьсгалаар цэцэглүүлж, СУИС-ийн харьяа бүтцийн 6 сургуультайгаа хамтран энэ сарын 2-нд “Монгол эрдэнэ-2023” уран бүтээлийн нэгдсэн тоглолтыг Соёлын төв өргөөд амжилттай зохион байгуулаад байна. Өдгөө хоёр дахь жилдээ зохион байгуулагдаж буй энэ тоглолт нь “Хэл, соёлыг эрхэмлэх жил” уриатай 2022-2023 оны хичээлийн жилийн сургалт-судалгаа, уран бүтээлийн шилдэг үр дүнг харуулсан тайлант тоглолт юм. Тэр утгаараа СУИС-ийн ахлах болон бүтцийн сургуулиудын сургалтын чанар, хөгжил дэвшил, дэлхийн болон үндэсний урлагийн хөгжлийн чиг хандлагыг тодорхойлж, мэргэжлийн уран бүтээлчдийн авьяас чадварыг тодотгосон гайхамшигтай тоглолт болов.
“Монгол эрдэнэ-2023” нэгдсэн тоглолтод СУИС болон СУИС-ийн харьяа Бүжгийн урлагийн сургууль, Дүрслэх урлагийн академи, Радио, телевиз, медиа урлагийн сургууль, Соёлын сургууль, Театрын урлагийн сургууль, Хөгжмийн урлагийн сургуулийн бакалавр, магистрант, докторант оюутнууд, мөн “Бадмаараг” ахлах сургуулийн сурагчид, төгсөгчид, багш нар зэрэг нийт 500 орчим уран бүтээлчид, хүүхэд залуус оролцжээ. Хамтран зохион байгуулагчаар Нийслэлийн Засаг даргын Тамгын газар, Нийслэлийн Соёл урлагийн газар ажилласан байна.
Соёл урлагийн салбар бол шинийг сэтгэж, бүтээн туурвих, авьяас билэг, ур чадвар дээр суурилж, үйл ажиллагаа явуулдаг өвөрмөц онцлогтой салбар. Тэр ч утгаараа дэлхий нийт даяарчлагдаж, техник технологи эрчимтэй хөгжиж буй энэ үед улс орнуудын холбоо харилцаа, хамтын ажиллагааг өргөжүүлэн хөгжүүлэхэд соёлын салбар чухал үүрэг гүйцэтгэж байдаг.
Мөн хэт цахимжсан өнөөгийн нийгэмд зөв үлгэр дуурайлж үзүүлж, соён гэгээрүүлэх, хүмүүжүүлэн төлөвшүүлэх зэрэг олон чухал үүрэг гүйцэтгэдэг, аль ч улс оронд эдийн засгийн өндөр ашиг авчрах чадамжтай салбар хэмээн үнэлэгдэж байдаг.
Тиймээс энэ удаагийн “Монгол эрдэнэ-2023” нэгдсэн тоглолтын нэг онцлог нь олон нийтэд зориулсан соёлын үйлчилгээг тогтмолжуулах, соёл урлагаар дамжуулан залуу үеийг төлөвшүүлэх, монголчуудын эрхэмлэн дээдлэх үнэт зүйлсийг таниулах, түгээн дэлгэрүүлэх, иргэдийн соёл урлагийн боловсролыг дээшлүүлэхийг зорьж, Нийслэлийн Засаг даргын Тамгын газар, Соёл, урлагийн их сургуулийн хамтран ажиллах санамж бичгийн хүрээнд болж байгаа чухал арга хэмжээ юм.
