Гал зогсоох хэлэлцээрийн хүрээнд Хамасын ахлах удирдлагуудыг Газын зурвасаас гарахыг Израилийн тал санал болгожээ. Энэ талаар олон улсын хэлэлцээртэй ойр байгаа хоёр эх сурвалж мэдээлсэн байна.
Газын зурвас дахь мөргөлдөөн бараг дөрвөн сар орчим үргэлжилж буй ч Израилийн тал Хамасын хамгийн томоохон удирдагчдыг барьж авч чадаагүй байна. Одоогоор Хамасын байлдааны хүчний 70 орчим хувь нь бүрэн бүтэн байгаа аж. Хамасын толгойлогчид бүс нутгаас гарах нь мэдээж Израилийн хувьд давуу тал болно.
Хамасын гол удирдагчид Доха, Катар, Бейрут зэрэг Палестины нутаг дэвсгэрээс гадна амьдардаг гэдэг. Энэ сарын эхээр л гэхэд Бейрут дахь нэг командлагч Израилийн агаарын цохилтод өртөж амиа алдсан билээ.
Гал зогсоох өргөн хүрээний хэлэлцээр сүүлийн долоо хоногуудад идэвхтэй үргэлжилж байна. Тухайлбал, өнгөрсөн сард Варшавт Израилийн тагнуулын албаны дарга Дэвид Барней, энэ сард Дохад АНУ-ын Төрийн нарийн бичгийн дарга Энтони Блинкен тэргүүтэй хүмүүс хэлэлцээг үргэлжлүүлэв. Цагаан ордны Ойрхи Дорнодын асуудал эрхэлсэн дээд албан тушаалтан Бретт МакГурк энэ долоо хоногт Египет, Катарт очиж цаашдын хэлэлцээг хийнэ.
Гэсэн ч Газын зурвасаас удирдагчдыг нь гаргах Израилийн төлөвлөгөөг Хамас хүлээж авахгүй байх магадлал өндөр.
Энэ саналыг арванхоёрдугаар сард Варшавт болсон хэлэлцээний үеэр Дэвид Барней анх дэвшүүлжээ. Тэрбээр АНУ Тагнуулын төв агентлагийн дарга Билл Бөрнс, Катарын ерөнхий сайд Мухаммед бин Абдулрахман аль Тани нартай энэ үеэр уулзсан. Улмаар Блинкений оролцсон хэлэлцээний үеэр яриаг үргэлжлүүлжээ.
Эх сурвалж: CNN
