Улаанбаатар хотын А бүсэд автомашины зогсоолын төлбөр 1 цаг нь 5000 төгрөг бол Б бүсэд 1 цаг нь 4000 төгрөг байхаар тооцжээ.
Дээрх төлбөрийн хэмжээг судлаачид, мэргэжилтнүүдийн гаргасан тооцоололд үндэслэн гаргасан гэдгийг Монгол Улсын сайд, Улаанбаатар хотын авто замын түгжрэлийг бууруулах үндэсний хорооны дарга Б.Дэлгэрсайхан мэдэгдээд байна.
Түгжрэл үүсч буй нэг том шалтгааны нэг нь зогсоол хүртээмжгүйгээс үүсч буй бөгөөд томоохон зах, худалдааны төвд лангуу түрээслэгчид өдөржин автомашинаа зогсоолд үнэгүй байршуулдаг бол төрийн албан хаагчид ч мөн ийм эрх эдэлдэг аж.
Судалгаагаар төрийн албаны 63 мянга орчим албан хаагч хувийн тээврийн хэрэгслээрээ ажилдаа ирж, очдог дүн гарчээ.
Иймээс Улаанбаатар хот дахь бүх авто зогсоолын төлбөрийг өндөр үнэтэй болгох зөвлөмжийг Улаанбаатар хотын авто замын түгжрэлийг бууруулах үндэсний хорооноос нийслэлийн Засаг даргын Тамгын газарт хүргүүлээд буй юм байна.
Мөн Түгжрэлтэй тэмцэх сайд Б.Дэлгэрсайхан “Зогсоолыг олон нийтийн хяналтад шилжүүлнэ. Бүх зогсоолыг ТББ, нөхөрлөлд өгөхөөр төлөвлөөд байгаа. Нийт зогсоолын зардлын 50-60 хувь нь зогсоолыг ажиллуулж байгаа хүмүүсийн цалинд зарцуулагдана. Үлдсэн мөнгийг Авто замын санд төвлөрүүлнэ. Төвлөрсөн мөнгийг авто зогсоол тохижуулах, камержуулах, хөгжлийн бэрхшээлтэй иргэдэд зориулсан зогсоол хийхэд зарцуулна” гэж мэдэгдээд байна.
