Япон улсын саран дээр буулгасан анхны судалгааны станц хоёр дахь шөнөө амжилттай давсныг тус улсын сансрын агентлаг JAXA өчигдөр мэдээллээ.
Ням гарагийн орой уг станцаас дохио ирснийг “гайхамшиг” гэж судлаачид үзэж байна. Учир нь энэ станц Цельсийн -170 хэмийн температур хүрдэг сарны урт шөнийг давахаар бүтээгдээгүй юм.
Сарны шөнө дэлхий дээрх 14 хоногтой тэнцэх урт үргэлжилдэг.
Нэгдүгээр сарын 20-ны өдөр Япон улс SLIM (Smart Lander for Investigating Moon) судалгааны станцаа сарны гадаргуу дээр буулгаж чадсан юм. Ингэснээр тус улс АНУ, Зөвлөлт, Хятад, Энэтхэгийн дараа дэлхийн дагуулд амжилттай хүрсэн тав дахь улс болсон.
Гэхдээ SLIM станцад техникийн доголдол гарч, төлөвлөж байснаас өөр өнцгөөр буусны улмаас эрчим хүчний систем нь нарны гэрлээр шууд цэнэглэгдэх боломжгүй болсон юм.
Тиймээс саран дээр буусныхаа дараа хэдхэн цаг ажиллаад батарейн цэнэг нь багасаж, унтраахаас өөр аргагүй болж байжээ.
Найм хоногийн дараа нарны гэрэл зөв өнцгөөр тусахад станц сэрж, хэдэн өдрийн турш ажиллаж, геологийн судалгаа явуулсны эцэст нэгдүгээр сарын сүүлээр эхэлсэн сарны шөнө дахин унтах горимд шилжсэн юм.
Японы эрдэмтэд сарны чулуулаг болон дэлхийн эрдсийн найрлагыг харьцуулах замаар сарны үүсэл гарлын талаар мэдээлэл олж авахаар ажиллаж байна.
Эх сурвалж: Associated Press
