Зам, тээврийн хөгжлийн сайд С.Бямбацогт улсын төсвөөс 281 тэрбум төгрөгийг өөрийн танил тал, ах дүүсийн сүлжээ компаниудаар дамжуулан авсан байж болзошгүй. Энэ хэргийг шалгаж өгнө үү хэмээн сэтгүүлч Х.Ган-Ялалт хэд хоногийн өмнө мэдээлэл хийсэн. Тэгвэл энэ талаар Зам, тээврийн хөгжлийн сайд С.Бямбацогт өөрийн цахим хаягаараа дамжуулан дараах тайлбарыг хийжээ.
Тэрээр “Тавилттай гүтгэлэгт баримттай няцаалт хийнэ. Ээлжит захиалгат гүтгэлэг эхэлжээ. Мөнөөх л зурагдсан пянз шиг улиг болон хашхирдаг тендер, концесс, Хөгжлийн Банк гэсэн муухан найруулсан жүжгийн зохиолын нооргоо захиалгаар хөдөлдөг хэдэн нөхдийн гарт бариулж, нийгмийн тайзан дээр тавих гэж оролдон аргаа барж буй бололтой.
Ноднин зургаадугаар сард анх нүүрсний хулгайг ил гаргаж тавьсан. Зам, тээврийн хөгжлийн сайд болсон цагаасаа хойш төмөр зам тойрсон хулгай, хил боомт, авто замын тендерүүд, Дарханы замд нүүрлэсэн авлига, хулгайг зоригтой илчилсний хариу бололтой.
Угаасаа ингэж гүтгэх, дайрах, худал мэдээллээр бөмбөгдөх бүрд өөрөө хүсэлтээ өгч удаа дараа АТГ, прокурор, цагдаад шалгуулж үнэн зөвөө тогтоолгосоор ирсэн юм. Энэ удаад ч ор үндэслэлгүй худал гүтгэлгийг баримтаар няцаана. Хууль хяналтын байгууллагаар шалгуулж нэрээ цэвэрлэнэ, гүтгэсэн нөхөдтэй хуулийн хэлээр ярих болно” гэжээ.
