Уул уурхай, хүнд үйлдвэрийн сайд Ж.Ганбаатар шатахууны нийлүүлэлтийн талаар өнөөдөр мэдээлэл өглөө.
Тэрбээр, “Сүүлийн нэг сард нийлүүлэлтээс шалтгаалж хүндрэл учирч байгаад хүлцэл өчье. ОХУ өөрөө дотооддоо өнөөдрийн байдлаар өвлийн түлш болон бензинийн хомстолтой байна. Түүхэнд байгаагүй нөхцөл байдал үүсээд байгаа. Энэ нөхцөл байдалд манайд шууд болоод шууд бусаар нөлөөлж байна.
Манай экспорт түүхэнд байгаагүй дээд хэмжээнд хүрсэн. Дунджаар 30 сая тонн нүүрс гаргадаг байсан бол 60 гарсан. Оны эцэст 70 сая гарах магадлалтай. Томоохон 5-6 уурхай манай нийт дизель түлшний 60 хувийг эзэлдэг. Энэ өөрөө бид эдийн засаг хэр өссөнийг харуулж байгаа.
Сүүлийн гурав хоног иргэд дараалалд зогсож, хүндрэл үүслээ. ОХУ-ын Ангарскийн үйлдвэрээс 90 хувийг нь нийлүүлдэг. Тэндээс ачигдсан бүтээгдэхүүн 4-5 хоногийн дотор л ачигддаг. Өнөөдрийн байдлаар 18 мянган тонн АИ92 замд явж байна. Зарим нь ороод ирсэн байна.
Цаашид үнийг өсгөхгүй. Үнэ харин бууж байгаа. Бид 705 ам.доллараар таван жилийн хатуу гэрээтэй. Энэ үнээ таван жилд барина. Үнэ өсөх ямар ч шалтгаан байхгүй гэдгийг үүгээр хэлж байна.
Иргэд зайлшгүй шаардлагагүй бол дараалал үүсгэхгүй байхыг л хүсье” хэмээн хэллээ.
