Ардчилсан намын дэд дарга И.Мөнхжаргал өнөөдөр /2024.04.01/ мэдээлэл хийлээ. Тэрбээр, “Авлига, албан тушаалын гэмт хэрэгт холбогдсон этгээдтэй байгуулсан өмгөөллийн хөлс, хэмжээг нийтэд ил тод нээлттэй болгох талаар авилгалын улмаас нийгмийн тогтвортой болон аюулгүй байдалд үүсч буй бэрхшээл, аюул занал нь ардчилсан тогтолцоо, үнэт зүйлс, түүнчлэн ёс зүйн үнэт зүйлс, шударга ёсыг сулруулж, тогтвортой хөгжил, хууль дээдлэх ёсонд хохирол учруулж байгаад сэтгэл зовниж дэлхийн 190 гаруй улс нэгдэн орсон.
Харин Монгол Улс НҮБ-ын Ерөнхий Ассамблейн 2003 оны 10 дугаар сарын 31-ний өдрийн 58/4 тоот тогтоолоор баталсан Авилгалын эсрэг НҮБ-ын Конвенцийг 2005 оны 10-р сарын 27-ны өдөр соёрхон баталсан. Ийнхүү Авилгалын эсрэг НҮБ-ын Конвенцийг Монгол Улс соёрхон батлаад 20 гаруй жил өнгөрсөн ч Монгол Улсад төдийлөн үр дүн гарсангүй.
“Транспарэнси интернэшнл”-ийн 2023 оны тайланд 2012-2023 оны хооронд 180 орноос авлигын индекс нь эрс муудсан зургаан улсын нэгээр Монгол Улс шалгарчээ. Тодруулбал, 2016 оноос хойш бараг л 50-иад байраар ухарч 121 дүгээр байрт оржээ. Энэ нь Дайн тэмцэлтэй Сьерра Леон, Шри ланк, тоталитар дэглэмтэй Беларусаас муу үзүүлэлт юм. Сүүлийн үед авлигын гэмт хэрэг шүүх дээр олон сараар удах, олон хэргүүд хэрэгсэхгүй болох, цагаадах гэх мэт асуудлууд үүсч байна. Олон нийтийн дунд авлигын улмаас олсон орлогоос өмгөөлөгчийг санхүүжүүлэх, зарим тохиолдолд өмгөөлөгчөөр дамжуулж шүүхэд авлига өгч байж болзошгүй ч гэсэн хардлага байна.
Тиймээс энэ асуудлаар олон нийтэд зөв мэдээлэл түгээх үүднээс авлигын гэмт хэрэгт өмгөөлөл үзүүлж байгаа өмгөөлөгчдийн цалин хөлс, урамшууллыг олон нийтэд ил тод, нээлттэй болгоно.
