IJF буюу Олон улсын жүдо бөхийн холбооны энэ оны эхний томоохон тэмцээн болох Парисын Их дуулга өнгөрөгч амралтын өдрүүдэд боллоо. Монгол Улсаа төлөөлөн 18 тамирчин өрсөлдсөнөөс эмэгтэйчүүдийн -63 кг-ын жинд Б.Ганхайч хүрэл медаль хүртэв. Бөхийн орон гэгддэг Монголын олимп, дэлхийн аваргад оролцдог чансаатай үндсэн шигшээ баг нэг хүрэл медальтай ирсэнд жүдо сонирхогчид шүүмжлэлтэй хандаж байна. Гэтэл Японы жин тус бүрийн хоёрдугаар номерын тамирчид нийт найман медаль авч, багийн дүнгээр Францын ард удаалжээ.
Мөн АНЭУ-ын нэр дээрээс барилдаж буй Б.Нармандах эрэгтэйчүүдийн -66 кг-ын жинд Ё.Басхүүг ялж, хүрэл медаль хүртсэн бол Б.Хорлоодой эмэгтэйчүүдийн -52 кг-ын жинд тавдугаар байр эзэлжээ. АНЭУ-аас нийт гурван тамирчин Парист ирсэн бөгөөд гурвуулаа хэсгээсээ гарч, медалийн төлөө өрсөлдсөн аж.
Монголын жүдочдын амжилт сүүлийн үед тааруу байгаа нь нууц биш. IJF-ийн Их дуулгын цуврал тэмцээнээс алтан медаль хүртээгүй тун удсан. Хамгийн сүүлд өнгөрсөн оны зургадугаар сард эх орондоо болсон Улаанбаатарын Их дуулгаас хоёр алтан медаль хүртжээ. Тодруулбал, Ё.Басхүү болон Б.Гончигсүрэн нар жин тус бүртээ тэргүүлсэн аж. Тэгвэл үүнээс хойш хичнээн тэмцээнд оролцож, ямар амжилт үзүүлсэн бэ?
- Унгарын Мастерс – Э.Ариунболд /мөнгө/, Б.Баасанхүү /хүрэл/
- Загребын Гран При – Г.Алтанбагана /тавдугаар байр/
- Бакугийн Их дуулга – Оролцоогүй
- Абу Дабигийн Их дуулга – Б.Эрхэмбаяр /хүрэл/
- Токиогийн Их дуулга – Ё.Басхүү /мөнгө/, Л.Сосорбарам /хүрэл/
- Португалын Гран При – Б.Гончигсүрэн /хүрэл/, Г.Наранцэцэг /хүрэл/
- Парисын Их дуулга – Б.Ганхайч /хүрэл/
Ийнхүү сүүлийн алтан медаль хүртсэнээс хойш зургаан тэмцээнд оролцон хоёр мөнгө, зургаан хүрэл медаль хүртжээ. Дундуур нь Азийн наадамд оролцож, хоёр мөнгө, гурван хүрэл медалийн эзэд болсон.
Энэ жил олимптой чухал жил. Монголын ард түмэн жүдочдоосоо л шаргал медаль харж, хүлээж байгаа. Бэлтгэл цугларалт ч эхлээд удаагүй байна. Тамирчид одоо л формондоо орж, барилдаанаа мэдэрч эхлэх үе. Гол нь тэмцээн бүрт ач холбогдол өгч, чансааны оноогоо цуглуулах хэрэгтэй. Одоогоор Монголын жүдочдоос эрэгтэй тамирчдаас Ё.Басхүү болон эмэгтэйчүүдээс Г.Наранцэцэг хоёр хамгийн өндөр оноотой явна. Үүнээс гадна олимпийн найдвар Ц.Цогтбаатарын бэртэл хурдан эдгэрч, олимпийн өмнө формоо олж, тэмцээн уралдаандаа оролцоосой гэж олон хүн хүсч буй.
Хүссэн хүсээгүй ирэх Парисын олимпийн дараа жүдогийн нэг үе солигдоно. Шигшээ багийн дасгалжуулагчдаас эхлээд тамирчид хүртэл халаагаа өгч, ирэх олимпийн цикльд Монголын нэрийг дуурсгах тамирчид гарч ирнэ.
