АНУ-ын арми Суданы Хартум хотоос Америкийн дипломат ажилтнууд болон тэдний гэр бүлийнхэн болох 100-гаад хүнийг ням гарагийн өглөө нүүлгэн шилжүүлсэн хэмээн тус улсын Ерөнхийлөгч Жо Байден мэдэгдлээ.
Тодруулбал Суданд эрх мэдлийн төлөө өнгөрсөн долоо хоногоос эхлэн байнгын арми болон Шуурхай дэмжлэг үзүүлэх хүчин хэмээн өөрсдийгөө нэрлэсэн хагас цэрэгжүүлсэн арми хооронд гал нээж, ширүүн тулаан үргэлжилж байгаа юм. Энэ үеэр тус улсын нийслэл Хартум хот хүчтэй бөмбөгдөлтөд өртөж, олон зуун хүн амь үрэгдэж, олон мянган хүн шархадаад байна.
Мөн Францын Гадаад хэргийн яам тус улсаас дипломат ажилчид болон иргэдээ нүүлгэн шилжүүлж эхэлсэн байна. Гэвч байлдаж буй хоёр тал хоёулаа Францын элчин сайдын яамнаас гарах үед нүүлгэн шилжүүлэх цуваа руу гал нээсэн тул буцаж эргэжээ. Нүүлгэн шилжүүлэх цуваа руу гал нээснээр Францын нэг иргэн шархадсан гэх мэдээлэл байгаа бөгөөд одоогоор Францын талаас ямар нэгэн мэдэгдэл хийгээгүй байна.
Эх сурвалж: Reuters агентлаг
