Өнгөрсөн ням гарагт /2024.02.02/ Йордан дахь АНУ-ын цэргийн бааз руу террорист бүлэг дроноор халдаж, гурван цэрэг амь үрэгдсэн. Үүний дараа АНУ шаардлагатай хариу арга хэмжээ авах төлөвлөгөөг баталж, Ирак болон Сири дэх байршлуудад агаарын цохилт өгч эхэлсэн билээ.
Тэгвэл Цагаан ордны Үндэсний аюулгүй байдлын зөвлөх Жейк Салливан ням гарагт /2024.02.04/ мэдэгдэл хийхдээ Ойрх Дорнод дахь Иранаас дэмжлэг авдаг террорист бүлгүүдийн эсрэг цохилт өгсөөр байх болно гэсэн байна.
АНУ нь Ирак, Сири дэх байршлуудаас гадна Йемен дэх хуситуудад агаарын цохилт өгч байгаа юм. Тодруулбал ням гарагт АНУ болон Их Британийн зэвсэгт хүчин Йемений 36 байршилд цохилт өгчээ.
Салливан “NBC” агентлагт “Бид нэмэлт цохилт, нэмэлт арга хэмжээ авч, манай зэвсэгт хүчин рүү дайрч, Америк иргэн амь үрэгдэх үед АНУ хариу үйлдэл үзүүлнэ гэсэн тодорхой мессежийг үргэлжлүүлэн илгээх бодолтой байна” гэж хэлсэн юм.
Аравдугаар сарын 7-нд Газын зурвасын дайн эхэлснээс хойш мөргөлдөөн Ойр Дорнодын бусад орнууд руу тархах эрсдэлүүд гарч ирсээр байна. Газын зурвас дахь палестинчуудыг дэмждэг хэд хэдэн бүлэг мөргөлдөөнд хөндлөнгөөс нөлөөлөх гэж оролдож буй.
Тухайлбал Ливан дахь Хезболла бүлэг Израил-Ливаны хилтэй ойролцоох Израил объектуудад агаарын цохилт өгөх болсон. Мөн Иранаас дэмжлэг авдаг бүлгүүд Сири, Ирак дахь АНУ-ын цэргийн баазууд руу халдаж байгаа. Йемен дэх Хусит бүлэг Газын зурвасын дайн зогсох хүртэл Улаан тэнгис дэх хөлгүүд рүү халдана гэж мэдэгдсэн. Эдгээр асуудлууд Ойрх Дорнодод үүсээд буй нөхцөл байдлыг илүү хурцатгаж байгаа юм.
Эх сурвалж: Reuters
