Архангай аймгийн иргэдийн хурлын дарга Б.Батжаргал нь өөрийн албан тушаал, эрх мэдлээ ашиглан удаа дараа хууль зөрчсөн талаар өнөөдөр Архангай аймгийн Шинэ намын төлөөлөгч Ц.Гантулга, Ц.Амарсайхан нар мэдээлэл хийлээ.
Ц.Гантулга, Тэрбээр “Иргэдийн хурал гэдэг нь иргэдэд тулгарч буй асуудлыг цааш нь мэдээлж, иргэдэд тусалдаг байгууллага буюу төр иргэн хоёрыг холбох байгууллага гэж боддог. Гэтэл Архангай аймгийн ИТХ нь улс төрийн нам болон намын холбоотой иргэд , албан тушаалтны гэмт хэрэг, буруутай шийдвэрүүдийг хаацайлдаг болсон байна. Сумдын удирдлагуудын дур мэдэн бусдад газар худалдаж, өмчлүүлэх зэрэг асуудлууд маш ихээр гарч байна. Тиймээс аймаг, сум, дүүрэг, багийн иргэдийн төлөөлөгчдийн хурлыг дарга нарыг иргэд сонгодог горимд шилжүүлмээр байна.
Мөн намын томилгоогоор дарга болсон хүмүүс гэмт хэргийг нуун дарагдуулж байгаа нь Архангай аймагт тодоор илэрч байна. Сүүлийн гурван жил Архангай аймгийн засаг дарга нар удаа дараа солигдож, үүнийгээ дагаад ИТХ-ын гишүүд өөрчлөгдөж, ажил үүргээ гүйцэтгэхээ больсон” гэв.
Архангай аймгийн Шинэ намын дарга Ц.Амарсайхан, “Монгол улсын засаг захиргаа нутаг дэвсгэрийн нэгж, түүний удирдлагын тухай хуулийн 46.2-т зааснаар иргэдийн нийтийн хурал болон аймгийн иргэдийн хурлыг улиралд нэг удаа зохион байгуулах ёстой байдаг. Гэтэл ИТХ-ын дарга Б.Батжаргал нь өөрт шаардлагатай тохиолдолд иргэдийн хурлыг зохион байгуулдаг. Хэрэв өөрт нь ашигтай бол хурлаа дуусгалдаг, ашиггүй бол хурлаа хаяад явчихдаг.
ИТХ-ын төсөв нь торгуулийн тодорхой хувиас бүрддэг. Гэтэл Б.Батжаргал нь албаны мөнгийг хувьдаа шамшигдуулдаг нь баримтаар баталгаажсан. Энэ мэт хууль бус үйлдлээс шалтгаалан өнгөрсөн оны арванхоёрдугаар сарын 1-ний өдөр ажлаас нь чөлөөлөх санал хүсэлтээ гарган аймгийн ЗДТГ хуралдсан. Гэтэл ЗДТГ-ын ардчилсан намын эрх мэдэлтнүүд хурлыг хаяж гарсан юм. Үүнээс үүдэн ИТХ-ын даргын талаар хэлэлцээгүй бөгөөд одоо хүртэл хууль бус үйлдэл гаргасаар байна. Иймд Архангай аймгийн иргэдийн хурал дахь Ардчилсан намын бүлгийн дарга Ч.Мөнхбатыг шударга, үнэнээр хууль зөрчсөн этгээдэд хуулийн хариуцлага хүлээлгэнэ үү гэж хүсэж байна” гэлээ.
