Улсын их хурлын дэд дарга С.Одонтуяа болон Эмэгтэйчүүдийн холбооны зөвлөх зөвлөлийн гишүүд Гандантэгчинлэн хийдэд шавилан суудаг хүүхдүүд бэлгийн дарамтад өртөж, хүчирхийлүүлсэн асуудлын талаар өнөөдөр /2023.06.22/ мэдээлэл хийлээ.
Улсын их хурлын дэд дарга С.Одонтуяа “Шашны сүм хийдүүдэд хүүхдийн хүчирхийлэлтэй холбоотой асуудал гарсан. Энэ асуудал бол зөвхөн нэг сүм хийдтэй холбоотой ганц гарч байгаа тохиолдол биш. Тиймээс энэ асуудалд маш нухацтай хандах шаардлага үүслээ.
Яагаад гэвэл бусад сургууль, байгууллагуудад сонголт байдаг. Харин шашны сургуульд сонголт байдаггүй. Тиймээс хүүхдүүд шашны сургуулиасаа хасагдаж, байрнаасаа хөөгдсөн тохиолдолд өөр сонголт, орох сургууль байдаггүй учраас тэнд үйлдэгдсэн хэрэг, хүчирхийллийн асуудлууд нуун дарагдсан байдалтай байгаа юм.
Энэ асуудалд нэг тохиолдол гэж авч үзэхгүйгээр нийтээрээ анхаарч эцэг эхчүүд илүүтэй анхаарах ёстой. Бид өмнө гадаадад ийм асуудал гарч байсан талаар сонсож байсан. Энэ хэргүүд дээр хэдэн мянган хүн хамрагдсан, хэдэн мянган хүний эрх зөрчигдсөн байдаг. Монгол Улсад ийм асуудал гарсан учраас мөрдөх ажиллагаа явуулж, таслан зогсоох ёстой.
Бидэнд хүнлэг энэрэнгүй байхыг зааж, номлодог хүмүүс өөрсдөө хүүхдийн эрхийг ноцтой зөрчиж байгаа нь жигшмээр асуудал.
Тиймээс энэ чиглэлээр ажилладаг зөвлөхүүд, эмэгтэйчүүдийн холбооны нийгмийн зүтгэлтнүүд томоохон аян өрнүүлэхээр ажиллаж байна” гэлээ.
