Шанхай, Чунцин гэх мэт БНХАУ-ын томоохон хотуудад худалдааны газрууд Зул сарын баярын чимэглэлүүдээр дүүрчээ. Тэгвэл Хятадын зарим мужуудад Зул сарын баярын чимэглэлийг гаднын улсын нөлөө хэмээн хориглохоор оролдож байгаа аж.
Баруун өмнөд хэсэгт оршдог Юньнань мужид нэгэн үл хөдлөх хөрөнгө менежментийн компани худалдааны төвийн түрээслэгдчийг Зул сарын баярын карт, чимэглэл зарахгүй байхыг хэлжээ. Мөн тус компани харийн орны уламжлалыг сохроор дагах ёсгүй, өөрсдийнхөө соёлыг хүндлэх хэрэгтэй гэсэн байна.
Харин өмнөд бүсэд байрлах Донггуан болон зүүн хойд Харбин мужийн зарим сургуулиуд сурагчид болон эцэг эхчүүдийг харийн уламжлал, соёлыг бодож үзэлгүйгээр дагахгүй байхыг уриалжээ.
Хятадын баруун хойд хэсэгт орших Ганьсу мужид Коммунист залуучуудын эвлэл гишүүдээ Зул сарын оронд “Чанжин нуурын тулалдаан” киног тэмдэглэхийг уриалсан байна. Тэр кино дээр Солонгосын дайны үед БНХАУ-ын Ардын сайн дурын цэргүүд АНУ-ын цэргүүдтэй хийсэн ширүүн байлдааны талаар гардаг юм.
БНХАУ нь Христийн шашныг хориглодоггүй ч бусад бүх шашны адил засгийн газраас хатуу хяналт тавьдаг билээ. Хятадын эрх баригчид иргэдээ гаднын орнуудын нөлөөлөлд автахгүй байхыг уриалж байгаа ч эсэргээрээ үндэсний өв соёлоо дэлхий даяар тараах хүсэлтэй.
НҮБ өнгөрсөн долоо хоногт Хятадын уламжлалт Хаврын баярт НҮБ-ын баяр гэх тодотголыг олгосон. Үүний дараа БНХАУ-ын Гадаад хэргийн яамны төлөөлөгч “Бид Хаврын баярыг дэлхий даяар тэмдэглээсэй гэж хүсэж байна” хэмээсэн юм.
Эх сурвалж: Reuters
