БНХАУ-ын баруун хойд хэсэгт орших Шинжаан мужид цасан нуранги нэгэн жуулчдын тосгон рүү хүрэх замыг хаасны улмаас мянга гаруй хүн гацсан талаар Хятадын төрийн өмчит телевиз мягмар гарагт /2024.01.16/ мэдээлжээ.
Казахстан, ОХУ, Монголын хилийн ойролцоо оршдог Хэму байгалийн цогцолбор тосгон руу хүрэх зам цасан нурангид дарагдаад хэд хонож байгаа аж. Шинжаан мужийн Алтай мужид оршдог тус тосгонд 10 хоног үргэлжилж цас орсон учир гэж Хятадын телевиз мэдээлсэн байна.
Их хэмжээний цас орсны улмаас Алтай нурууны хурдны замын томоохон хэсгүүд олон арван цасан нурангид дарагджээ. Хэму тосгонд амарч явсан зарим жуулчдыг нисдэг тэргээр аюулгүй газарт хүргэсэн юм.
Нурангийн улмаас үүссэн цасан бүрхүүл зарим хэсэгт долоо метр хүрсэн тул цас цэвэрлэх төхөөрөмжөөр цэвэрлэх боломжгүй байгааг “CCTV” телевиз мэдээлжээ. Цасанд булагдсан 50 км орчим замыг цэвэрлэх ажилд долоо хоногийн өмнөөс эхэлсэн ч одоог хүртэл дуусаагүй байна.
Цасанд чулуу, хог хаягдал, модны мөчрүүд холилдсон байгаа нь эргэдэг цас цэвэрлэх машин ашиглах боломжгүй болгожээ. Ийм учраас аврагчид хүрз, экскаватор ашиглан замыг цэвэрлэж байгаа юм.
Уулархаг бүс нутагт цаг агаар хурдтай өөрчлөгддөг тул Хэму тосгон руу ханган нийлүүлэлт хүргэхэд мөн хүндрэл тулгарч эхэлжээ. Алтайн автозамын удирдлага аврах ажилд 53 хүн, 31 техник, тоног төхөөрөмж ашиглаж байгаа хэмээн мэдээлсэн байна.
Хурдны замын удирдлагын товчооны дарга Жао Жиншэнь “CCTV” телевизэд хэлэхдээ “Энэ цасан нуранги харьцангуй өвөрмөц, өмнө нь ийм их цас орсон тохиолдол бий. Гэхдээ ийм олон давтамжтай цасан нуранги үүсэж байгаагүй” гэжээ.
Хэму тосгон рүү хүрэх сүүлийн 4 километр замд их хэмжээний цас тогтсон тул замыг бүрэн чөлөөлөх ажилд тодорхой хугацаа шаардагдана гэж Жао нэмж хэлсэн юм.
Эх сурвалж: Reuters
