Засгийн газраас 2023-2024 оныг Авлигатай тэмцэх жил болгон зарлаж, “Шүүр” ажиллагааг хэрэгжүүлэхээр болсонтой холбогдуулан төрийн бүх шатны байгууллага, төрийн өмчийн аж ахуйн нэгжид хууль зөрчиж томилогдсон хүмүүсийг ажлаас чөлөөлөх үйл ажиллагаа явагдаж байна.
Энэ үйл ажиллагааны хүрээнд албан тушаалын тодорхойлолтод заагдсан мэргэжлийн тусгай шаардлагыг хангаагүй гэсэн шалтгаанаар олон хүмүүс албан тушаалаасаа чөлөөлөгдсөн, бас олон хүмүүс төрийн албаны сул орон тоон дээр зарлагдсан сонгон шалгаруулалтад оролцож чадахгүй нөхцөл байдал үүсээд байгаа ажээ.
Иймд “Шүүр” ажиллагааны талаар ЗГХЭГ-ын дэд дарга буюу Засгийн газрын Хяналт хэрэгжүүлэх газрын дарга Б.Баасандорж дараах мэдээллийг өгч байна.
Тэрээр “ЗГХЭГ-ын дарга Д.Амарбаясгалан өнгөрсөн хугацаанд нийт 3000 гаруй эрх бүхий албан тушаалтанд найман бүлэг асуудалд арга хэмжээ авах албан бичиг хүргүүлсэн. Уг албан бичиг нь эмч, багш, төрийн үйлчилгээний албан тушаалтанд хамаарахгүй.
Хуульд заасны дагуу зөвхөн төрийн тусгай албан хаагч, төрийн захиргааны албан хаагч, төрийн үйлчилгээний удирдах албан тушаалтнууд буюу дарга нарт хамааралтай. Мөн тэтгэвэр тогтоолгох насанд хүрсэн болон тэтгэвр тогтоолгосон эмч, багш нарт хамаарахгүй. Үүнийг дарга нар хавтгайруулж буюу зөрчиж хэрэглэсэн. Зөвхөн төрийн захиргааны албан тушаал дээр тэтгэвэр тогтоолгосон хүн ажиллаж болохгүй. Харин улс төрийн албан тушаал дээр ямар нэгэн хязгаарлалт байхгүй гэсэн үг.
Нийтлэг илэрсэн зөрчлийг ангилж үзвэл төрийн захиргаа болон төрийн үйлчилгээний албан тушаал дээр 349 албан хаагч, төрийн өмчит болон төрийн өмчийн оролцоотой компаниуд дээр 76, төрийн тусгай албан тушаал дээр 9 хүнийг чөлөөлсөн. Үүнээс гадна төрийн захиргаа болон төрийн үйлчилгээний албан тушаал дээр 15 хүн, төрийн болон төрийн өмчит компаниуд дээр 12 хүнд сахилгын арга хэмжээ авсан байна.
Одоогоор төрийн захиргаа болон төрийн үйлчилгээний албан тушаал дээр 976 хүнд ажлаас чөлөөлөх мэдэгдэл хүргүүлээд байгаа бол төрийн болон орон нутгийн өмчит компаниуд дээр 150, төрийн тусгай 51 алба хаагчдад мэдэгдэл хүргүүлсэн.
Илэрсэн зөрчлүүдийг салбараар нь ангилж үзвэл ихэнх нь буюу 2900 гаруй нь боловсролын байгууллага% 1600 орчим нь санхүүгийн салбарт, 779 нь эрчим хүчний салбарт 656, уул уурхайн салбарт 114 зөрчил илэрсэн байна.
Тэтгэвэр тогтоолгочхоод төрийн үйлчилгээний албан тушаалд ажиллаж байгаа эмч, багш нар ажиллаж болно. Ялангуяа урилгаар ажиллаж байгаа эмч, багш нар ажиллаж болно.
Төрийн үйлчилгээний албан тушаалд 65-аас дээш насны иргэн гэрээний үндсэнд ажиллахыг Төрийн албаны тухай хууль, Хөдөлмөрийн тухай хууль болон Төрийн албаны зөвлөмжөөр зөвшөөрсөн.
Гэтэл иргэдээс ирсэн мэдээллээс харахад ТҮК-ийн ажилчид, эмч, багш нарыг ажлаас чөлөөлсөн байна. Тиймээс ирэх долоо хоногоос яамдаас эхэлж, хяналт шалгалтын ажиллагааг эхлүүлнэ.
