Монгол Улс, АНУ-ын Батлан Хамгаалах Яамд хоорондын жил бүрийн зөвлөлдөх уулзалт энэ сарын 21-23-ны өдрүүдэд Вашингтон хотноо боллоо.
Зөвлөлдөх уулзалтыг Монголын талаас БХЯ-ны Төрийн нарийн бичгийн дарга, бригадын генерал Д.Ганхуяг, Америкийн талаас АНУ-ын БХЯ-ны Монгол, Хятад, Тайванийн асуудал хариуцсан дэд сайдын орлогч М.Чейс нар хамтран даргалав.
Монгол Улсаас АНУ-д суугаа Элчин сайд Ө.Батбаяр, Зэвсэгт хүчний Хуурай замын цэргийн командлагч, бригадын генерал Ч.Цогтжаргал болон албаны бусад төлөөлөгчид оролцлоо.
Талууд хоёр талын батлан хамгаалахын харилцаа, хамтын ажиллагааны асуудлуудаар ярилцаж, олон улсын болон бүс нутгийн аюулгүй байдлын талаар санал солилцжээ.
Мөн энэхүү зөвлөлдөх уулзалтын хүрээнд төлөөлөгчид Төрийн департамент болон Ахмад дайчдын асуудал эрхэлсэн яамны удирдлагатай ажил хэргийн уулзалтууд хийж, хоёр талын харилцааны асуудлаар харилцан ярилцсан байна хэмээн БХЯ-наас мэдээллээ.
