Цахим залиланд өртсөн хохирогчид өнөөдөр (2023.06.15) мэдээлэл хийлээ.
Хохирогч иргэдийн зүгээс “Виза консултинг” компанийн захирал Г.Болорчимэг, Л.Эгшиглэн гэж хүмүүс бий. Энэ компани АНУ, Австрали, БНСУ-руу виз гаргаж өгнө гэж олон жил залилан хийж байна. Иргэдээс маш олон тэрбум төгрөгийн залилан хийсэн. Хамгийн гол нь Л.Эгшиглэн гэдэг хүнийг л цагдаа дээр байцааж байгаа. Тус компанийн захирал Г.Болорчимэгийг огт дуудахгүй байна. Нөгөө хүн нь дахиад виз гаргадаг газар нээчихсэн, хүмүүсийг залилаад байдаг. Хэн ч хариуцлага тооцдоггүй. Машин унаагаа зарчихсан, хүнээс хүүтэй мөнгө зээлээд хохирчихсон маш олон хүмүүс байна. Цагдаагийн байгууллагаас тодорхой мэдээлэл өгдөггүй.
“Visa consulting Mongolia” нэртэй 96 мянган дагагчтай фэйсбүүкийн пэйж нь нээлттэй, дахиад хүмүүсийг нэмж мөнгө залилсаар байна. Худлаа газар гээд хүмүүст сэрэмжлүүлэг болгоод сэтгэгдэл бичихээр устгаад байдаг. Утас руу нь залгахаар утсаа авахгүй.
Ах дүү хамаатан садан, ар гэрийнхэн нь үнэтэй хаус, жийп машин унаад яваад байдаг. Энэ бүх хөрөнгийн хаанаас, яаж олсон юм бэ гэдгийг шалгуулмаар байна.
“Виза консултинг” компани нь иргэдээс зуучлалын төлбөр гэж таван сая төгрөг авдаг. Тийзийн мөнгө гэж хоёр талын мөнгө авдаг. Тэгээд тийзийг нь захиалдаггүй, визийг нь мэдүүлдэггүй. Хоёр том хүн, нэг хүүхдийн виз гаргахад 18 сая төгрөг авдаг. Тэгээд зуучлалын төлбөр гэж таван сая төгрөг, виз мэдүүлэгт нэг сая төгрөг гээд нийтдээ 24 сая төгрөг авч, залилаад алга болчихно. Бид ээлж дараалан цагдаагийн байгууллагад очиж, хандахад бүх бичиг баримтыг нь хураан авсан гэсэн. Гэтэл оффис дээр нь бүх бичиг баримт нь байгаа, битүүмжилсэн зүйл ч байхгүй байна. Ганц Л.Эгшиглэн гэх хүнийг л шалгаад байх юм. Бусад хүмүүсийг ч бас шалгаж өгөхийг шаардаж байна” гэлээ.
