Гадаад улсад ажиллаж, амьдарч буй сонгогчид 34 улсын 47 Дипломат төлөөлөгчийн газрын дэргэдэх салбар комисст саналаа өглөө.
Гадаад улсад оршин сууж буй монголчууд 2024 оны УИХ-ын ээлжит сонгуульд саналаа өгөх үйл ажиллагаа өндөрлөлөө. Энэ удаагийн сонгуульд гадаад улсад байгаа 13 мянга 95 иргэн саналаа өгөхөөр сонгогчдын нэрийн жагсаалтад бүртгүүлснээс ирц 50 хувь давсныг Сонгуулийн Ерөнхий Хороо мэдээллээ.
БНСУ-ын Сөүл дэх салбар комисст сонгуулийн саналаа өгөхөөр 2656 иргэн бүртгүүлснээс 1845 хүн саналаа өгч, сонгогчдын ирц 69.47 хувь хүрчээ. Гадаадад суугаа монголчуудаас хамгийн олон буюу 2983 иргэн саналаа өгөхөөр бүртгүүлсэн БНСУ-д 18-19 насны 101 иргэн, 20-29 насны 747 иргэн, 30-39 насны 395 иргэн, харин 70-аас дээш насны зургаан иргэн саналаа өгсөн байна.
Кувейт улсад оршин сууж буй иргэд 100 хувь саналаа өгсөн бол Бүгд Найрамдах Узбекстан улс, Бүгд Найрамдах Ардчилсан Лаос Ард улс, Бүгд Найрамдах Киргиз улс, Арабын Нэгдсэн Эмират улс, Бүгд Найрамдах Социалист Вьетнам улс, Арабын Бүгд Найрамдах Египет улс, Бүгд Найрамдах Беларусь улс, Бүгд Найрамдах Энэтхэг улс, Сингапур улсад оршин сууж буй иргэдийн ирц 90 гаруй хувьтай байжээ.
Гадаад улс дахь иргэдийн санал хураалт дууссаны дараа салбар комиссууд битүүмжилсэн дугтуйтай саналын хуудас болон бусад баримт, бичгийг төв комисст, төв комисс сонгуулийн ерөнхий хороонд хүргүүлэх юм.
Гадаадад байгаа иргэдийн санал тоолох ажиллагааг Сонгуулийн Ерөнхий Хорооны байранд санал авах өдрийн 22.00 цагаас саналын хуудсыг санал тоолох төхөөрөмжид хийж тоолон дүнг мэдээлэхээр хуульчлаад байгаа бөгөөд түүнээс өмнө гадаад улсад байгаа иргэдийн өгсөн саналыг мэдэх боломжгүйг Сонгуулийн Ерөнхий Хороо онцоллоо.
Гадаад улсад ажиллаж, амьдарч буй сонгогчид УИХ-ын 48 гишүүнийг хувь тэнцүүлэн төлөөлөх аргаар буюу нам, эвсэлд саналаа өгөх замаар сонгосон юм. Өөрөөр хэлбэл гадаад улсад байгаа иргэд зөвхөн нам, эвслийг дугуйллаа.
Үүнээс гадна аймаг, нийслэл, сум, дүүргийн иргэдийн төлөөлөгчдийн хурлын 2024 оны ээлжит сонгууль аравдугаар сарын 11-ний өдөр болно. Иймд тус сонгуульд оролцох нам, эвсэл зургаадугаар сарын 25-наас өмнө сонгуулийн мөрийн хөтөлбөр болон хандивын тайландаа дүгнэлт гаргуулахаар орон нутгийн Аудитын газар хүргүүлэхээр байна.
