Гар утас, компьютер тоглоомонд бага насны хүүхдүүд донтож байна гэсэн мэдээллийг өмнө нь та олонтаа сонссон байх. Тэгвэл сүүлийн жилүүдэд Сэтгэцийн эрүүл мэндийн үндэсний төвд энэ чиглэлээр хэвтэн эмчлүүлэх хүүхдийн тоо нэмэгдсээр байгааг албаныхан хэлж байна.
Манай улсад анх компьютерт донтсон хүүхэд 2004 онд Сэтгэцийн эрүүл мэндийн төвд хэвтэн эмчлүүлж байсан бол түүнээс хойш жил ирэх тусам тус эмнэлэгт хандах хүүхдийн тоо нэмэгдсээр байгаа ажээ. Сүүлийн үед насанд хүрэгчдийн дунд ч бас компьютер тоглоомд донтох тохиолдол гарч байгааг эмч нар хэлж байна. Үүний шалтгааныг эмч нар нийгмийн стресс, бухимдалтай холбоотой хэмээн тайлбарлав.
РС тоглоомын газар ихэвчлэн 10-15 насныхан хонон өнжин тоглож байгаа харагддаг. Тэгвэл энэ нь өсвөр насныхны сониуч зантай холбоотой. Мөн гэр бүлийн хараа хяналт сул, эцэг эхийн дарамт шахалт их, гэр бүлийн уур амьсгал таагүй зэрэг шалтгаанаас болж комьютер тоглох, улмаар донтох эмгэг болтлоо даамжирдаг аж. Иймд “Сургууль, цэцэрлэгээ тарж ирээд гар утас, компьютер тоглон суугаа хүүхэддээ ээж, аавууд анхаарал хандуулж, цагийн хязгаарт нь хяналт тавих нь хамгийн чухал. Тоглоомын дон томчуудын архидан согтуурах донтой адилхан хор уршигтай гэдгийг эмч нар сануулж байна. Сургуулийн өмнөх насны хүүхэд өдөрт 20-30 минут, бага, дунд ангийнхан 30 минутаас нэг цаг тоглоход хүүхдийн эрүүл мэндэд ямар нэг сөрөг үр дагавар үзүүлэхгүй. Харин түүнээс удаан хугацаагаар тоглох нь сэтгэцийн эрүүл мэндэд сөрөг нөлөөтэй гэдгийг СЭМҮТ-ийн эмч нар онцгойлон анхааруулж байна. Энэ тухай дараах зөвлөгөөг уншигч танд хүргэж байна.
Э.Бэрцэцэг
