ОХУ-ын алдартай жүжигчдийн нэг Юрий Соломин өчигдөр Москва дахь гэртээ 88 насандаа таалал төгсжээ.
Тэрбээр 1988 оноос хойш Малый Театрын уран бүтээл хариуцсан захирлаар ажиллахын зэрэгцээ жүжиг найруулж, сургуульд багшилж байсан юм.
Соломин уран бүтээлийн замналынхаа туршид нийтдээ 50 гаруй жүжиг, 60 гаруй кинонд дүр бүтээсэн байна. Тэр бас 1990-1992 оны хооронд ОХУ-ын соёлын сайдаар ажиллаж байжээ.
1975 онд Японы нэрт найруулагч Акира Куросавагийн “Дерсу Узала” кинонд бүтээсэн дүр Соломинийг дэлхий нийтэд таниулсан юм.
Зөвлөлт-Японы хамтарсан уг кино нь Куросавагийн гадаад хэл дээр найруулсан цорын ганц кино, бас зураг авахдаа 70 мм-ийн хальс ашигласан цорын ганц бүтээл болжээ.
“Дерсу Узала” кино “Гадаад хэл дээр бүтээсэн шилдэг кино” төрөлд Оскарын шагнал хүртсэн юм.
Соломин нь ОХУ-ын төрийн шагнал, Зөвлөлт Холбоот Улс болон Зөвлөлт Социалист Бүгд Найрамдах Холбоот Орос Улсын ардын жүжигчин зэрэг хэд хэдэн цол хүртэж байжээ.
1996 онд Киргизстан улсын ардын жүжигчин болсон бол “дэлхийн соёл урлагт оруулсан хувь нэмрийнхээ төлөө” Японы урлагийн академийн шагнал хүртэж байв.
Соломин 2023 оны арваннэгдүгээр сард тархины цус харвалтын улмаас эмнэлэгт хэвтэж, нэгдүгээр сарын 9-нд гэртээ гарч байжээ.
Түүнийг ирэх Даваа гарагт Троекуровскийн оршуулгын газарт 2019 онд нас барсан гэргий Ольгагийнх нь булшны дэргэд оршуулахаар болсон байна.
Эх сурвалж: The Moscow Times
