Шинэ Зеландын парламентын гишүүн дэлгүүрээс хэд хэдэн удаа бараа хулгайлсан хэрэгт холбогдож, цагдаагийн байгууллагад шалгагдаж эхэлсэн тул албан тушаалаасаа огцорчээ.
Ногоон намын хууль тогтоогч Голриз Гахраман нийтдээ гурван удаа дэлгүүрээс хувцас хулгайлсны нэгийг нь Оклэнд хотод, хоёрыг нь нийслэл Веллингтонд үйлдсэн гэгдэж байна.
Хүүхэд насандаа гэр бүлийн хамт Иранаас дүрвэж ирсэн тэрбээр 2017 онд Шинэ Зеландын засгийн газрын гишүүн болсон анхны цагаач болж байжээ. Улс төрч болохоосоо өмнө Гахраман НҮБ-д хүний эрхийн хуульчаар ажиллаж байсан юм.
Ажлын стресс дарамт нь санаанд оромгүй үйлдэл гаргахад хүргэснийг тэр тайлбарлажээ.
“Олон хүний урмыг хугалсандаа би маш их харамсаж, уучлал гуйж байна” гэж Гахраман мэдэгдсэн байна.
Өчигдөр түүний Оклэнд хотын брэнд дэлгүүрээс гар цүнх авч гарсныг харуулсан хяналтын камерын дүрс бичлэг ил болсны дараа огцрох шийдвэрээ зарлажээ.
42 настай Гахраман өмнө нь ямар нэг гэмт хэрэг үйлдэж байгаагүй юм.
“Энэ бол миний тайлбарлаж чадах зан үйл биш. Эмнэлгийн үзлэг шинжилгээний дараа би өөрийгөө хэвийн биш байгааг ойлгосон. Сэтгэцийн эрүүл мэндийн мэргэжилтэн надаас урьд өмнө гарч байгаагүй уг үйлдлийг сүүлийн үеийн үйл явдлуудаас үүдэлтэй стрессийн хариу үйлдэл гэж дүгнэсэн” гэж тэр мэдэгджээ.
Ногоон намын тэргүүлэгчдийн нэг Жэймс Шоу огцрох өргөдлөө өгсөн гишүүнээ “Парламентад сонгогдсон цагаасаа хойш бэлгийн хүчирхийлэл, бие махбодын хүчирхийлэл, амь насанд нь халдах заналхийлэлд байнга өртөж байсан” гэж тайлбарласан байна.
“Энэ нь парламентын бусад гишүүдтэй харьцуулахад илүү их стресс дарамтыг түүнд учруулсан. Парламентын гишүүнээр ажиллах хугацаанд нь цагдаа нар дээрх заналхийллүүдийг шалгаж байсан. Та ч гэсэн ийм нөхцөлд амьдарч байсан бол үр дагаврыг нь амсах байлаа” гэж тэр хэлжээ.
Гахраман өмнө нь онлайн орчинд болон бодит амьдрал дээр өөрийн гарал угсаа, хүйс, үзэл бодолтой холбоотой дарамт шахалт амсаж байгаагаа хэд хэдэн удаа ярьж байсан юм.
“Онлайн орчинд намайг айлгаж сүрдүүлэх болсонтой холбоотойгоор би парламентын чуулганд ирэх болон явахдаа хамгаалагч дагуулж явах болсон” гэж тэр 2021 онд TVNZ сувагт ярьж байжээ.
2017 онд Гахраман цагаан арьстныг дээдлэгч этгээдүүдийн сүрдүүлгийн улмаас хувийн хамгаалалт авч байсан юм.
Сүүлийн үед Хамас-Израилийн дайнтай холбоотой түүний Палестинчуудыг өмгөөлсөн байр суурийг зарим хүмүүс нэлээд шүүмжлэх болсон байна.
Эх сурвалж: BBC
