Өнгөрсөн жил Европт улаанбурхны өвчлөл 45 дахин нэмэгдсэн гэж ДЭМБ анхааруулав. Эрүүл мэндийн албан тушаалтнууд тохиолдлын тоо одоо хүртэл нэмэгдэж байгаа, цаашид тархахаас сэргийлэхийн тулд яаралтай арга хэмжээ авах шаардлагатай байгааг онцолжээ.
Тодруулбал 2023 онд Европ даяар улаанбурхны 42,200 тохиолдол илэрсэн бол 2022 онд 941 халдвар бүртгэгдсэн байна. Халдварын тоо гэнэт нэмэгдэн явдал нь цар тахлын үед улаанбурхны вакцин тариулах хүүхдүүдийн тоо багассантай холбоотой гэж ДЭМБ мэдэгдсэн юм.
Европ дахь нөхцөл байдлын талаар ДЭМБ-ын бүс нутгийн асуудал хариуцсан захирал, доктор Ханс Клюге “Европын бүсэд улаанбурхан өвчний тохиолдол 30 дахин нэмэгдээд зогсохгүй, 21 мянга орчим хүн эмнэлэгт хэвтэн эмчлүүлж, таван нас баралт бүртгэгдээд байна. Сэтгэл түгшүүрлэмээр тоо баримт. Вакцинжуулалт нь хүүхдүүдийг аюулд хүргэж болох өвчнөөс хамгаалах цорын ганц арга” гэж хэлжээ.
ДЭМБ-ын мэдээлснээр улаанбурхны таван тохиолдол бүрийн хоёр нь нэгээс дөрвөн насны хүүхэд, таван халдвар тутмын нэг нь насанд хүрсэн хүн байсан аж.
Улаанбурхны вакцины эхний тунг хийлгэж амжаагүй байгаа бага насны хүүхдүүд, жирэмсэн эмэгтэйчүүд, дархлаа султай хүмүүст халдвар хамгийн эрсдэлтэй. Халдвар даамжирсан тохиолдолд хатгаа, менингит, хараа алдах, унаж татах хүндрэл үзүүлж болдог.
Эх сурвалж: BBC
