Арванхоёрдугаар сарын 28 буюу өчигдөр Сонгинохайрхан дүүргийн Эрүүгийн хэргийн анхан шатны шүүхэд Zarig.mn сайтын эрхлэгч, сэтгүүлч Н.Өнөрцэцэгийн цагдан хориог сунгах эсэх шүүх хурал болсон ба өмгөөлөгчдийг оролцуулаагүй. Ингээд сэтгүүлч Н.Өнөрцэцэгийг дахин 30 хоног хорих шийдвэрийг гаргасан. Уг нь Н.Өнөрцэцэгийг энэ сарын 4-ний өдөр 30 хоногийн хугацаатай саатуулсан бөгөөд цагдан хорионы хугацаа дуусахад хэдхэн хоног үлдээд байв.
Харин эл үйл явдалтай зэрэгцэж Монгол Улсын Ерөнхийлөгч Ухнаагийн Хүрэлсүх иргэн Д.Мөнх-Эрдэнэд уучлал үзүүлэв.
Эргэн санабал, одоогоос найман сарын өмнө иргэн Д.Мөнх-Эрдэнийн шүүх хурал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд гурван өдөр үргэлжилж Д.Мөнх-Эрдэнэд гурван жил, 10 сарын хорих ял оноож, нийтийн албанд ажиллах эрхийг таван жилээр хасаж шийдвэрлэснээс гадна 95.7 сая төгрөг төлүүлэхээр болсон. Үүний дараа давж заалдаад нэг жил 10 сар болж хөнгөрсөн байдаг. Тэрбээр нийт ялынхаа есөн сарыг эдлээд байгаа бөгөөд энэ сард магадлангаар суллагдах байсан.
Үүнээс харбал Д.Мөнх-Эрдэнэ түүний уучлалтай, уучлалгүй хэдхэн хоногийн дараа магадлангаар суллагдахаар байсан. Тэгвэл энэ нөхцөлд яагаад түүнд Ерөнхийлөгч уучлал үзүүлэв гэдэг анхаарал татна. Мөн сэтгүүлч Н.Өнөрцэцэгийг дахин 30 хоног хорихоор шийдвэрлэсэн эл үйл явдалтай түүнийг суллах болсон уг шийдвэр зүгээр ч нэг давхцчихаагүй. Үүнийг Д.Мөнх-Эрдэнийг суллах нэрийдлээр дуулиан үүсгэж иргэдээс оноо авах гэсэн Ерөнхийлөгчийн тоглолт гэж харж болно. Учир нь Н.Өнөрцэцэгийг хорих үйл явц Ерөнхийлөгч У.Хүрэлсүхийн даалгавраар өрнөсөн гэдгийг сэтгүүлчид мэдээлсэн, олон нийтэд ч ойлгож авсан. Үүний өмнө болон дараа иргэд Ерөнхийлөгчийг буруутгаж, асуудлыг эсрэг талд харах болсон юм. Энэ бүхнээс Д.Мөнх-Эрдэнийг МУ-ын Ерөнхийлөгч уучилъя гэж уучлаагүй, иргэдэд алдсан оноогоо түүнээр нөхөх гэж л уучилжээ гэдгийг ойлгож болохоор байна.
