Нийслэлийн иргэдийн төлөөлөгчдийн хурал өнгөрсөн долоо хоногийн Пүрэв гаригт болсон. Тодруулбал, тус хуралдаанаар нийслэлийн түгжрэлийг бууруулахын тулд нийтийн тээврийн парк шинэчлэлтийн асуудлыг хэлэлцсэн. Энэхүү хэлэлцүүлгээс гарсан онцлох саналуудыг нэгтгэн танилцуулж байна.
Нийтийн тээврийн шинэчлэл бол урт хугацаанд хийх ажил. Тиймдээ ч эхний ээлжид автобусны тоог нэмж, жолоочдын цалинг 3,5 сая төгрөгт хүргэхээр төлөвлөж байгаагаа албаныхан танилцуулсан. Учир нь зөвхөн автобус авснаар бүх асуудлыг шийдэх боломжгүй. Тиймээс шинэ автобуснуудыг хувийн хэвшилд түрээсээр олгосноор жилд 100 автобус авах мөнгийг Нийтийн тээврийг хөгжүүлэх санд төвлөрүүлэх боломжтой байна.
10 ЖИЛ НЭМЭЭГҮЙ АВТОБУСААР ЗОРЧИХ 500 ТӨГРӨГИЙГ 1000 БОЛГОНО
Дараагийн нэг онцлох сэдэв бол зорчих үнийн тариф. Оны өмнө иргэдээс санал авч олонхын дургүйцлийг ихэд хүргээд буй нэг сэдэв бол автобусаар зорчих үнийг нэмэх тухай. Нийтийн тээврийн үйлчилгээний төлбөрийн хэмжээг тогтоох тухай тогтоолын төслийг танилцуулах үеэр үнэтэй холбоотой хэд хэдэн дэд сэдвийг онцолсон. Тодруулбал, автобусны тарифыг 2014 онд хүүхэд 200, том хүн 500 төгрөг гэж тогтоосноос хойш өөрчлөөгүй. 30 минутын дотор дамжин суулт үнэгүй байдаг. Гэхдээ тогтоолын төслөөр хүүхдийн автобусаар зорчих үнийг 200 төгрөг хэвээр байхаар тусгасан байна.
Харин иргэд нийтийн тээврээр зорчихдоо өдөрт дунджаар 1000 төгрөг зарцуулдаг гэх судалгаа байдаг. Тиймээс дөрвөн удаагийн зорчилтыг 1000 төгрөг байхаар тооцож, өглөө автобусанд суухдаа картаа уншуулж энэ мөнгөө төлөх зохицуулалтыг тогтоолын төсөлд тусгасан байна.
Өөрөөр хэлбэл, 1000 төгрөг төлөөд цагт баригдахгүйгээр тухайн өдрөө дөрвөн удаа автобусанд суух боломжтой гэсэн үг аж.
НИЙТИЙН ТЭЭВРИЙН САНГИЙН ҮЙЛ АЖИЛЛАГАА ТОГТВОРЖИХ ЁСТОЙ
Иргэдийн бухимдлыг ихэд төрүүлдэг хүлээлт өндөр нийтийн тээврийн салбарт сан гэж бий. Тус сангийн үйл ажиллагааг тогтворжуулж, идэвхжүүлснээр жилд 28.2 тэрбум төгрөгийг санд төвлөрүүлэх боломжтой байна. Ингэснээр жилд 20 тэрбум гаруй төгрөг тус санд төвлөрч, төвлөрсөн мөнгийг цаашид шинээр автобус авахдаа зарцуулах аж. Энэ хүрээнд хийгдэж байгаа эхний ажил бол шинээр авсан 600 автобусны 300 гаруйг нь хувийн хэвшилд түрээсээр ашиглуулахаар гэрээ хэлэлцээр хийж байгаа явдал.
Одоогийн байдлаар нийт 115 автобусыг хувийн хэвшилд шилжүүлээд байна. Аж ахуйн нэгжүүд долоон жилийн хугацаанд автобусны төлбөрийг бүрэн барагдуулах аж.
Түүнчлэн 2009 оноос хойш худалдаж авсан автобуснуудын эргэн төлөлтийг аж ахуйн нэгжүүдтэй тохиролцож байгаа гэсэн юм. Ингэснээр нийтийн тээврийн сан хуримтлалтай болж тус мөнгөөр иргэдэд хүндрэл чирэгдэл учруулж буй нийтийн тээврийн салбарт парк шинэчлэлтийг жил бүр хийх боломж бүрдэнэ.
ЦААШИД ЗӨВХӨН ТОМ ОВРЫН АВТОБУС АВНА
Түгжрэлийг бууруулах нэг алхам бол нийтийн тээвэр болон багтаамж ихтэй тээврийн хэрэгслийг дэмжих гэдгийг НИТХ-ын үеэр төлөөлөгчид онцолсон. Энэ хүрээнд ажилчид болон сургуулийн автобусыг дэмжих зорилгоор татварын хувь хэмжээг бууруулахаар Авто тээврийн болон өөрөө явагч хэрэгслийн албан татварын хэмжээг батлах тухай асуудлыг НИТХ-аар хэлэлцүүлсэн юм. Ингэснээр аж ахуйн нэгж, байгууллагууд найм болон түүнээс дээш хүн зорчих боломжтой тээврийн хэрэгслийг үйл ажиллагаандаа ашиглах нөхцөл бүрдэнэ гэж үзэж байгаа аж.
Гэхдээ нөгөө талаар дээрх төрлийн албан татварын хувь хэмжээг шууд батлах боломжгүй учир судалгаа, мэдээлэл шаардлагатай гэж үзэж байгаагаа мөн албаныхан танилцуулсан.
