Узбекистан улсын Самарканд хотноо түргэн болон түргэвчилсэн төрлийн Дэлхийн Аварга шалгаруулах тэмцээн боллоо.
Тэмцээнд Хэнтий аймаг, Үндэсний шигшээ баг, Каисса клубийн шатарчин Их мастер Төрмөнхийн Мөнхзул түргэн буюу блиц төрөлд тэмцээний туршид хошуучлан дэлхийн шилдгүүдтэй манлайлсаар шагналт дөрөвдүгээр байрт шалгарав.
Энэ нь Монголын шатрын түүхэн дэх бахдам том амжилт болж буй юм. Учир нь их мастер Т.Мөнхзул 17 өрөг тоглохдоо дэлхийн шатрын дөрвөн аваргатай оноолт таарч хоёрыг нь хожиж нэгтэй нь тэнцсэн. Нийт 12 эрэгтэйчүүдийн их мастер цолд хүрсэн энэ цаг үеийн шилдэг эмэгтэй шатарчдыг хожиж, тэнцсэн нь дэлхийд үнэлэгдэхүйц үзүүлэлт боллоо.
Мөн блиц төрөлд эх орноо төлөөлөн оролцсон МУГТ, Их мастер Б.Мөнгөнтуул 20 дугаар байр, Их мастер Д.Номин-Эрдэнэ 60 дугаар байрыг тус, тус эзлэв. Түргэвчилсэн буюу Рапид төрөлд Их мастер Т.Мөнхзул 17 дугаар байр, Их мастер Д.Номин-Эрдэнэ 24 дүгээр байр, МУГТ, Их мастер Б.Мөнгөнтуул 30 дугаар байранд шалгарлаа.
