Хойд Солонгосын удирдагч Ким Жон Уны дүү Ким Ё Жон Өмнөд Солонгосын ерөнхийлөгч Юн Сук Ёлыг “мунхаг зоригтой” гэж тохуурхжээ. Гэсэн атлаа Юн Сук Ёлын өмнөх либерал ерөнхийлөгч Мүн Жэ Инийг “маш ухаалаг” гэж нэрлэв. Энэ нь Өмнөд Солонгос дахь дотоод хуваагдлыг өдөөх зорилготой үйлдэл байж магадгүй аж.
Өмнөд Солонгосын ерөнхийлөгч Юн Сук Ёл шинэ жилээр баярын мэндчилгээ хүргэхдээ Хойд Солонгосын цөмийн заналхийллийн хариуд Сөүлийн цэргийн чадавхийг бэхжүүлж, АНУ-тай эвслээ зузаатгана гэж хэлжээ. Тэр 2022 онд ажлаа хүлээж авснаасаа хойш олон удаа ийм мэдэгдэл хийсэн.
Энэ мэдэгдлийн хариуд Ким Ё Жон дээрх егөөдлийг хэлсэн байна. “Энэ хүн хүчилсэн энх тайвныг байнга уриалахын зэрэгцээ хориг арга хэмжээ болон Өмнөд Солонгос, АНУ-ын харилцааг нэмэгдүүлэхээр улайрч гүйцсэн. Хамтарсан цэргийн сургуулилалт нь нөхцөл байдлыг эцсийн туйлд нь хүргэж байна” гэж Ким Ё Жон хэллээ. Мөн “Юн Сук Ёлын мунхаг зоригтой байр суурь нь Хойд Солонгосыг цэргийн хөтөлбөрөө сайжруулахад хүргэсэн. Түүний шинэ жилийн мэндчилгээндээ хэлсэн үг Хойд Солонгост илүү их цөмийн чадавхитай болох үндэслэлийг дахин өглөө” гэв.
Дараа нь Юн Сук Ёлыг өмнөх ерөнхийлөгч Мүн Жэ Интэй харьцуулжээ. Мүн Жэ Иний талаар хэлэхдээ “Түүний тайвшруулах бодлогын улмаас Хойд Солонгос зэвсгийн хөтөлбөрөө урагшлуулж чадахгүйд хүрсэн. Тэр маш ухаалаг бөгөөд зальтай” гэжээ.
Гэвч ийн Мүн Жэ Инийг магтсан нь түүний өмнөх мэдэгдлүүдтэй зөрчилдөж байна. 2021 онд тэр Мүн Жэ Инийг “Америкийн өсгөсөн тоть” гэж нэрлэж байв.
Эх сурвалж: AP
