Мэдээллийн технологийн салбарт шинэ дэвшилтэт санааг бүтээгдэхүүн үйлчилгээ болгон хувиргах, шинэ хэрэгцээг эрж олох, шинэ технологид суурилсан бизнесийг хөгжүүлэхээр байгуулагдсан, дэмжлэг туслалцаа шаардлагатай компанид ажлын таатай орчин, менежментийн иж бүрэн дэмжлэг туслалцаа үзүүлэх замаар тэднийг санхүүгийн болон үйл ажиллагааны хувьд тогтворжсон дотоод гадаадын зах зээлд өрсөлдөх чадвартай болгон өсгөн бойжуулах нь инкубаторын хөтөлбөрийн гол зорилго билээ.
51 дэх удаагийн үндсэн инкубаторын сонгон шалгаруулалтад оролцогчдын материалыг 2024 оны 6-р сарын 20-ноос 2024 оны долоодугаар сарын 20-ны өдрүүдэд хүлээн авч материал тус бүрийг лацдан 2024 оны долоодугаар сарын 25-ны шалгаруулалтын өдөр ажлын хэсгийн өмнө нээж, компаниуд өөрсдийн бүтээгдэхүүн үйлчилгээгээ амжилттай танилцууллаа.
Сонгон шалгаруулалтад оролцогчдыг дараах 5 шалгуур үзүүлэлтийн дагуу үнэлж дүгнэв. Үүнд:
– Шинэлэг бүтээлч санаа
– Хэрэгжүүлэх боломжтой оновчтой шийдэл
– Эдийн засгийн үр ашиг
– Удирдлагын болон мэргэжлийн ур чадвар
– Үйл ажиллагааны төлөвлөгөө
Шалгаруулалтад материалаа илгээн бүртгүүлсэн нийт 14 компаниас “Лингорс” ХХК, “Метаког метрикс” ХХК-ууд дээрх шалгуур үзүүлэлтүүдийг хангаж Мэдээллийн Технологийн Үндэсний Парк-ын инкубаторын хөтөлбөрт хамрагдах эрхтэй боллоо гэж Мэдээллийн Технологийн Үндэсний Паркаас мэдээллээ.
