Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ойн Үндэсний их баяр наадмын үндэсний бөхийн барилдаанд дөрөв давсан 32 бөхөөс допингийн шинжилгээ авсан.
Ингэхэд Монгол улсын арслан М.Бадарчийн шинжилгээнээс Дэлхийн допингийн эсрэг агентлагаас гаргасан хориглосон жагсаалтад орсон бодис илэрсэн тул уг барилдааны бүх давааг хүчингүйд тооцож, улсын арслан цолыг хурааж, түүнийг Үндэсний их баяр наадмаар барилдах эрхийг 2027 оны долдугаар сарын 12-ныг дуустал дөрвөн жилийн хугацаагаар хассан.
Тэрбээр өнгөрсөн хугацаанд өөрөөс нь сэргээшийн төрлийн бодис илэрснийг илтэд үгүйсгэж байсан ч Үндэсний их баяр наадмыг зохион байгуулах комисс хуралдаж шийдвэрээ гаргасны дараа “Төрийн наадамд түрүүлнэ гэдэг бол бөх хүн болгонд олдоод байдаггүй ховорхон хувь тавилан билээ харин энэ зүйлийг минь дагаад сэргээш гэх зүйл дагаж гарч ирсэнд туйлын их харамсаж байна. Миний бие олон жилийн хүч хөдөлмөрөө хамгаалж, хардах эрхийнхээ хүрээнд дээрх асуудалд цаашдаа нухацтай хандах болно гэдгээ албан ёсоор мэдэгдэж байна” хэмээн байр сууриа илэрхийлсэн.
Улмаар М.Бадарч Монголын Олон улсын ба үндэсний Спортын арбитрын шүүхийн дэргэдэх допингийн давж заалдах комисс-т хандаж, өөрөөсөө сэргээш илэрсэн эсэхийг нягтлан шалгаж, хянан шийдвэрлүүлэх хүсэлт өгсөн байна.
Уг хүсэлт гомдлыг Спортын арбитрын шүүхийн шийдвэр гаргаж, Допингийн эсрэг үндэсний төвтэй уг асуудлаар уулзалт зохион байгуулсан тухай өмнө нь мэдээлж байв. Ингээд М.Бадарчийн асуудлаарх спортын арбитрын урьдчилсан хуралдааныг энэ сарын 23 буюу өнөөдөр товлосон.
Ташрамд дурьдахад, М.Бадарч допингийн шинжилгээний хариутай маргаагүй. Харин шинжилгээ авах процесс буюу шинжилгээ авах үед байлцсан цагдаа, тагнуулын ажилтнууд нь мэргэжлийн сургалтад суугаагүй гэдэг үндэслэлээр маргасан. Өөрөөр хэлбэл шинжилгээ авах процесст шадар сайд, баяр наадмын комиссын тушаалаар орж ирсэн цагдаа, тагнуулынхан сургалтад суугаагүй. Допингийн шинжилгээ авах тухай сургалтад суугаагүй байх нь олон улсын дүрмийн хувьд маргах үндэслэл болж болно.
“Монголын олон улсын ба үндэсний спортын арбитр” ТББ спортын төрөл бүрээс томилогдсон арбитрч, шүүгч, прокурор, өмгөөлөгч, хуульч нараас бүрддэг. Давж заалдах комиссын бүрэлдэхүүнд допингийн 6 арбитрч ажилладаг байна.
