ОХУ-ын сөрөг хүчний удирдагч Алексей Навальный олон удаагийн сонсголыг тодорхойгүй шалтгаанаар алгассаны эцэст Лхагва гаригт цахим хэлбэрээр сонсголд оролцов. Түүнийг Арктикийн алслагдмал шоронд шилжүүлээд удаагүй байна. 19 жилийн ял авсан тэрбээр инээмсэглэн, хошигносоор камерын өмнө гарч иржээ.
Навальный Арктикийн цаг агаарын тухай хошигножээ. Мөн “Намайг шилжүүлсний дараа өмнөх шоронгийнхон маань найр наадам, караоке үдэшлэг хийсэн болов уу? Тэр шоронгийн ажилтнуудыг ямар их санаж байна гээч. Энд нөхцөл байдал Владимир дахь Ик-6 шоронгоос хамаагүй дээр байна. Гэхдээ энд нэг л том асуудал байна. Цаг агаар нь хэцүү юм, энэ талаар аль шүүхэд нэхэмжлэл гаргахаа мэдэхгүй юм” гэж егөө утгаар ярьжээ.
Сонсголын бичлэгийг Оросын төв хэсэгт орших Владимир мужийн Ковров хотод түүний хоригдож байсан шоронгийн ойролцоох шүүх хурлын танхимд цацсан байна.
Навальныйг арванхоёрдугаар сард Арктик дахь ИК-3 хорих ангид шилжүүлсэн. Энэ нь Москвагийн зүүн хойд зүгт 1900 км зайд байдаг бөгөөд аюулгүй байдлын түвшингээрээ Орост дээгүүр ордог.
Ик-6 шоронд байхад нь түүнийг хувцсаа буруу товчилсон гэх мэт ялих шалихгүй шалтгаанаар олон удаа ялын өрөөнд суулгаж байжээ. Мөн шоронгийн албан тушаалтан түүний үзгийг хурааж авсны төлөө Навальный гомдол гаргаж байсан. Энэ гомдлынхоо төлөө тэр 12 хоног ганцаар хорих өрөөнд хоригджээ. Лхагва гаригийн сонсголын үеэр Навальный шоронгийн ажилтан руу хашгирч, нэрээр нь дуудан бүдүүлэг загнаснаа хүлээн зөвшөөрсөн. Гэхдээ үзэг хэрэглэхийг нь зөвшөөрсөн тул хурааж авах ёсгүй гэж хэлжээ.
Эх сурвалж: AP
