НАТО Хүйтэн дайн дууссанаас хойших хамгийн том цэргийн сургуулилалтыг 2024 онд хийхээр төлөвлөж байна. 40 жилийн дараах хамгийн том сургуулилалтад НАТО-ийн гишүүн 31 орон болон нэр дэвшигч Шведээс цэргүүд оролцоно.
НАТО-ийн гишүүн Их Британи онцгой олон цэрэг буюу 20 мянган цэрэг илгээхээр төлөвлөснийг тус улсын Батлан хамгаалахын сайд Грант Шаппс хэлэв. “Энэ нь Оросоос Украинд түрэмгийлсний дараа учирч буй аюул заналхийллийн эсрэг баталгаа өгөх зорилготой. Өнөөдөр НАТО урьд өмнөхөөсөө илүү томорсон боловч сорилтууд нь илүү томорсон байна. Иймээс Их Британи улс агаар, газар, далайн бүх хүчнээ НАТО-д илгээнэ” гэлээ.
Мөн тэрбээр “Хүйтэн дайны дараах энхийн ногдол ашиг дууссан тул барууны холбоотнууд Хятад, Иран, Хойд Солонгос, Орос зэрэг дайсантай тулгарах ёстой” гэж мэдэгджээ.
Их Британийн бүрэлдэхүүнд сөнөөгч онгоц, ажиглалтын нисэх онгоц, тэнгисийн цэргийн хамгийн дэвшилтэт байлдааны хөлөг онгоц, шумбагч онгоцууд, тусгай ажиллагааны хүчин зэрэг армийн бүх хүчин чадал багтана. Мөн нисэх онгоц тээгч хөлөг онгоц, “F-35B” сөнөөгч онгоц, нисдэг тэрэг бүхий “Carrier Strike Group” гэж нэрлэгддэг багаа илгээх аж.
Эх сурвалж: FRANCE24
