Нийслэлчүүд автомашиндаа бензин авч хийхийн тулд өдөржин, шөнөжин шатахуун түгээх станцын гадаа дугаарладаг ажилтай болов. Шар гэрэл нь ассан автомашинаа “хоол”-той залгуулна гэдэг ажлаас дутахгүй ажил болж хувираад байна.
Уг нь Уул уурхай хүнд үйлдвэрийн сайд Ж.Ганбаатарын хэлснээр бол арваад хоногийн өмнөөс бензин, шатахууны нийлүүлэлт хэвийн болсон байх ёстой юм. Гэвч өнөөдрийг хүртэл бахь байдгаараа. Харин ч шатахуун түгээх станцууд хязгаартайгаар автобензин нийлүүлдэг болсон. Уул уурхай хүнд үйлдвэрийн яамны Хүнд үйлдвэр, газрын тосны бодлогын хэрэгжилтийг зохицуулах газрын дарга Б.Анхбаярын тайлбараар бол иргэд өөрсдөө л буруутай бололтой. Учир нь, иргэд шатахуун түгээх станцын гадаа урт дараалал үүсгэснээр тухайн өдрийн түгээгүүр дэх шатахууныг дуусгаж байна. Хэрэглэгч энгийн өдрийнхөөс олон болсноор шатахуун түгээх станцын тухайн өдрийн нөөц дуусдаг гэжээ.
Угтаа бензин, шатахууны нийлүүлэлт хэвийн болсон бол энэ их түгжрээ дунд иргэд бензин, шатахуун хайн, нэгээс нөгөө шатахуун түгээх станц руу явж дугаарлан, өөртөө ажил нэмэх билээ. Гэвч албан тушаалтнуудад иргэд л буруутай болж хувираад байна.
