Засгийн газраас энэ оныг “Авлигатай тэмцэх жил” болгон зарлаад байгаа билээ. Энэ зорилтын хүрээнд хэрэгжүүлж буй “Шил” ажиллагааны үр дүнд Цахим хөгжил, харилцаа холбооны сайд Н.Учрал цаг үеийн мэдээлэл хийсэн юм. Тэрээ “Өнөөдөр Хөдөө аж ахуйг дэмжих сангийн зээлдэгчдийн мэдээллийг shilen.gov.mn сайтад байршууллаа. Хуучнаар “Тариалан эрхлэлтийг дэмжих сан”, “Мал хамгаалах сан” буюу нэгтгэн зохион байгуулсан “Хөдөө аж ахуйг дэмжих сан”-гийн 10325 зээлдэгчээс эхний ээлжид 6092 компани, иргэн, төрийн байгууллага, ТББ-ын мэдээллийг нийтэд ил болгож, байршууллаа. Үлдсэн 4000 гаруй зээлдэгчийн мэдээллийг энэ долоо хоногт багтаан ил болгоно” гэсэн юм.
Мөн төрийн өмчит болон төрийн өмчийн оролцоотой 71 компанийн ТУЗ-ийн гишүүдийн нэрсийг ил болгож байгаа аж. Тодруулбал, төрийн өмчийн 120 компанийн ТУЗ-ийн нэрсийн мэдээллийг ирэх 7 хоногт багтаан нээлттэй болгох ажээ. Тусгай сангаас зээл авах , төрийн өмчит компанийн ТУЗ-д сонгогдох нь буруу хэрэг биш. Гагцхүү ил тод, нээлттэй байж, иргэний шууд хараа хяналтын дор ажиллаж, хуулиа хэрэгжүүлэхийг “Шил” ажиллагаа баримталж буй юм гэдгийг Цахим хөгжил, харилцаа холбооны сайд Н.Учрал сануулсан юм. Түүнчлэн энэ тухай Ерөнхий сайд Л.Оюун-Эрдэнэ хэлэхдээ “Шил” ажиллагаанд хүч нэмж, албан даалгавар гарган ил тод байдлыг хангаж ажиллахыг үүрэг болгосноор төрийн байгууллагуудын мэдээллээ ил байршуулах үйл явц эрчимжиж байна, төхөөрөмжид уншигдах байдлаар бэлтгэж ирүүлсэн мэдээллүүдийг shilen.gov.mn сайтад нийтэлж байна. Иргэн нь илүү мэдээлэлтэй бол эрх мэдэлтэй байна. Хаана нууц байна, тэнд авлига бий. Төрд хэн, хаана, хэзээ, юу хийж байгааг иргэд хянаж, хулгай хийх боломжийг технологийн шийдлээр хумих нь “Шил” ажиллагааны үндсэн зорилго юм” гэв.
Б.Туул
