Он гарсаар Украины нутаг дэвсгэрт Оросын халдлага мэдэгдэхүйц идэвхжсэн. Тодруулбал, нэгдүгээр сарын 2-ны өдөр Украины хотуудад 35 шахед дрон, 99 пуужингаар халджээ. Украины агаарын довтолгооноос хамгаалах хүчин шахед дроныг бүгдийг нь, 99 пуужингаас 72-ыг нь устгаж чадсан байна. Энэ өдрийн агаарын цохилтын улмаас таван хүн нас барж, 130 гаруй хүн бэртэж гэмтжээ.
Харин нэгдүгээр сарын 3-ны өдөр ОХУ-ын арми Донецк мужийн Авдийвка хотод цохилт өгснөөр нэг хүн нас барж, хэд хэдэн хүн гэмтсэн байна. Тухайн өдөр 11:00 цагийн үед Авдийвкад дөрвөн пуужингаар цохилт өгсөн бөгөөд ингэхдээ орон сууцны барилгыг онилжээ.
Тэгвэл он гарахаас өмнөхөн буюу арванхоёрдугаар сарын 29-ний өдөр ОХУ 158 пуужин болон дроноор Украинд халдсан. Украины агаарын довтолгооноос хамгаалах хүчин эндээс 114-ийг устгаж чадсан байна. Агаарын цохилтын гол бай нь Киев, Одесса, Харьков, Запорожье, Львов гээд хамгийн том хотууд байв.
Сүүлийн үеийн халдлагуудад нийт 10 бүс нутгийн 18 суурин өртөж, 53 хүн нас барсныг Украины Дотоод хэргийн яам мэдээллээ. Мөн гэмтэж бэртсэн хүний тоо 170 хүрээд байна.
Энэ мэтчилэн Оросын халдлага илт идэвхжих болсон тул НАТО-Украины зөвлөлийн ээлжит бус хуралдааныг зохион байгуулах хүсэлтийг Киев гаргажээ. Энэ талаар Украины Гадаад хэргийн сайд Дмитрий Кулеба өчигдөр мэдэгдэв. Энэхүү уулзалтын гол сэдэв нь Украины агаарын довтолгооноос хамгаалах хүчийг бэхжүүлэх явдал юм. Оросын терроризм даамжрахаас өмнө Евро-Атлантын эв нэгдлийг харуулах зорилготой уулзалт гэж энэ уулзалтыг тодорхойлж байна.
Дашрамд дурдахад, нэгдүгээр сарын 17-18-ны хооронд НАТО, Украины үндэсний цэргийн штабын дарга нарын анхны уулзалтаа хийнэ.
Эх сурвалж: THE NEW VOICE OF UKRAINE
