“ОПЕК+”-ийн бүлгийн орнууд газрын тос олборлолтын хэмжээгээ ирэх сараас хоногт нэг сая баррелиар бууруулах гэнэтийн шийдвэр гаргажээ. Үүнээс болж дэлхийн зах зээл дээр газрын тосны үнэ нэмэгдээд байна.
Өнгөрсөн даваа гарагт Азийн арилжаанд “Брент” маркийн газрын тосны үнэ нэг баррель нь 5 доллараас дээш буюу 7 хувиар өсөж, 85 доллар давжээ. Дэлхийн нийт газрын тосны 40 хувийг үйлдвэрлэдэг ОПЕК-ийн шийдвэрээс болж газрын тосны үнэ энэ онд баррель нь 100 ам.доллар хүрч болзошгүй гэж шинжээчид таамаглаж байна.
Саудын Араб газрын тосны гарцаа хоногт 500 мянган баррелиар, Ирак улс 211 мянган баррелиар бууруулахаа мэдэгджээ. Газрын тос экспортлогч орнууд энэ шийдвэрээ “Газрын тосны зах зээлийн тогтвортой байдлыг хангахад чиглэсэн урьдчилан сэргийлэх арга хэмжээ” хэмээн тайлбарлажээ.
Харин АНУ үүнийг оновчгүй шийдвэр гэж үзэн, эрчим хүчний үнийг бууруулж, инфляцитай тэмцэхийн тулд олборлолтоо нэмэгдүүлэхийг ОПЕК-ийн өргөтгөсөн бүлэгт уриаллаа.
