ОХУ-ын арми Украины амаржих газар, цэцэрлэг, худалдааны төвүүд рүү бараг шөнө бүр олон сая ам.долларын үнэтэй пуужингаар цохилт өгч байна. Гэвч Украинд цохилт өгөх гэж хэт яаран сандраад, хэн үхэх нь оросуудад хамаагүй болов бололтой. Тодруулбал, Оросын арми Мягмар гаригт Воронеж муж руу санамсаргүй пуужин харважээ. Пуужин Петропавливка тосгонд өглөөний 09:00 цагт унасан. Хүний амь нас хохироогүй ч зургаан байшин эвдэрч, сүйджээ.
Цахим сүлжээнд нийтлэгдсэн бичлэгээс харахад дэлбэрэлтийн улмаас газарт асар том тогоо үүссэн байна.
Оросын арми оросууддаа заналхийлж байгааг Украины Дотоод хэргийн сайдын зөвлөх Антон Геращенко хэллээ. “Оросын эрх баригчид өөрсдийнх нь пуужин Воронеж мужид унасныг баталлаа. Мэдээллийг Воронеж мужийн амбан захирагч Гусев албан ёсоор баталсан. Тэрбээр энэ үйл явдлыг онцгой тохиолдол гэж нэрлэсэн. Украин руу пуужингаар довтлох үед пуужингийн замд байгаа бүс нутгийн оросууд хоргодох байранд орох ёстой. Оросын арми оросууддаа заналхийлж байна” гэж Геращенко хэлэв.
Харин Украины ерөнхийлөгч Владимир Зеленскийн зөвлөх асан Игорь Новиков энэ үйл явдлыг “үйлийн үр” гэж нэрлэжээ. “Энэ бол Украины эсрэг Оросын пуужингийн цохилтын үйлийн үр. Нэг пуужин хангалттай гэж үзээд Воронежийн тосгонд унажээ” гэв.
Энэ өдөр ОХУ 99 пуужингаар Украинд цохилт өгсөн. Украины Агаарын довтолгооноос хамгаалах хүчин 72 пуужинг нь устгаж чаджээ. Эндээс 10 нь баллистик Кинжал пуужин байв.
Нийслэл Киев хотын Соломянский дүүргийн өндөр байшин пуужингийн цохилтод өртсөнөөр нурангид дарагдан хоёр хүн амь үрэгдэв. Өөр 37 хүн эмнэлэгт хүргэгдсэн байна. ОХУ сүүлийн гурван өдрийн дотор Украины эсрэг 170 шахед дрон, 99 пуужин харвасныг Зеленский хэллээ.
Эх сурвалж: THE NEW VOICE OF UKRAINE, NEWS WEEK
