Такер Карлсон түүхийн талаарх сунжирсан яриаг няцаах зорилгоор “Энэ ямар хамаатай билээ, ерөнхийлөгч өө?” гэж асуусан ч Путин “Хоёулаа нухацтай ярилцах юм уу, зүгээр шоу хийх юм уу?” гэж сөргүүлжээ.
Нэг үгээр хэлбэл энэ ярилцлага Путины шоу болжээ. Тэр өмнө нь Адольф Гитлерийг Польш руу дайрахаас өөр аргагүй болсон гэж ярьж байсан удаатай. Энэхүү ярилцлагын үеэр ч бас Польшийг дурдаж, дэлхийн хоёрдугаар дайныг өдөөхөд хүргэсэн гэж буруутгажээ. Мөн “Украин бол Сталины хүслээр бий болсон хиймэл улс” гэжээ. Энэ үгээрээ тэр “Яг л Гитлерийн нэгэн адил Украинд арга хэмжээ авахаас өөр аргагүйд хүрсэн” гэсэн утга илэрхийлсэн байна.
Путины ярилцлагаас онцлох таван агуулгыг “The Telegraph” хуудас онцолжээ.
Юун түрүүнд, Такер Карлсон ОХУ-ын шоронд нэг жил хоригдож буй америк сэтгүүлч Эван Гершковичийн тухай асуужээ. Путин түүнийг суллахад нээлттэй гэдгээ илэрхийлсэн байна. Ингэхдээ Чеченийн тэрс үзэлтнийг хөнөөсөн хэргээр бүх насаар хорих ял эдэлж буй Вадим Красиковыг дурдаад, хоригдол солилцоо хийхэд нээлттэй гэжээ. Эван 2023 оны гуравдугаар сараас хойш Оросын алдарт Лефортово шоронд хоригдож байгаа бөгөөд дэлхий ертөнцөөс бүрэн тасарсан гэхэд болно. Тэрбээр өдрийн 90 хувийг жижиг өрөөнд өнгөрөөдөг.
Хоёрдугаарт, хэрвээ АНУ цэргүүдээ Украинд байрлуулбал Дэлхийн гуравдугаар дайн дэгдэх эрсдэлтэй гэж Путин хэлжээ. “АНУ дотоодын асуудалдаа илүү их анхаарал хандуулах ёстой. Танайд өөр хийх сайн үйлс байхгүй гэж үү? Танай хил дээр шилжилт хөдөлгөөний асуудал байна. 33 их наяд гаруй ам.долларын өрийн асуудал чинь байна” гэж Путин хэлсэн байна.
Путины хэлсэн дараагийн онцлох эшлэл бол “Элон Маскийг зогсоох боломжгүй” гэдэг үг байлаа. Тэрбээр үргэлжилсэн түүхийн лекцийнхээ дараа хүн төрөлхтөний ирээдүйн талаар ярьж эхэлжээ. Карлсон түүнээс “Хиймэл оюун ухаант гүрэн хэзээ бий болох вэ?” гэж асуухад Путин өөрийгөө шинжээч биш гэдгийг онцлоод, Элон Маскад бодсон зүйл байгаа байх гэв.
“Хүн төрөлхтөн генетик судлаачдын улмаас олон аюул заналхийлэлтэй тулгараад буй. Ер бусын супер хүнийг бүтээх боломжтой болчихлоо. Ямар нэг чиглэлээр мэргэшсэн хүн шүү дээ. Генетикийн хувьд инженерчлэгдсэн тамирчин, эрдэмтэн, цэргийн хүн. Элон Маск хэдийнэ хүний тархинд чип суулгасан гээд мэдээлээд буй. Элон Маскийг зогсоох арга үгүй. Тэр боломжтой гэж харсан бүхнээ хийнэ. Эдгээрийг зохицуулахын тулд олон улсын хэмжээний гэрээ хэлэлцээр шаардлагатай” гэж Путин хэлжээ.
Дөрөвдүгээрт, Путин “Хойд урсгал” хийн хоолойн хорлон сүйтгэх ажиллагааны ард АНУ-ын Тагнуулын төв газар байгаа гэж хэлэв. Хийн хоолойн дэлбэрэлтэд эхлээд ОХУ-ыг, дараа нь Украиныг дэмжигч бүлэглэлийг буруутгасан. Карлсон ярилцлагынхаа үеэр энэ талаар асуухад “Гарцаагүй та биз дээ” гэж Путин хариулжээ. Харин Карлсон “Би тэр өдөр завгүй байсан” гэж хошигносон байна.
Путин түүнийг залуудаа АНУ-ын тагнуулын байгууллагад элсэх гээд бүтэлгүйтсэн гэж хошигножээ. “Миний ойлгож байгаагаар таны нэгдэхийг хүссэн байгууллага биз дээ. Тэд чамайг хүлээж аваагүйд бид бурханд талархах ёстой” гэж Путин хэлсэн байна.
Эцэст, Путин Украин дахь дайн үргэлжилсээр байгаагийн нэг шалтгаан бол Борис Жонсон гэж хэлжээ. “2022 оны хавар Туркийн туслалцаатай байгуулсан энхийн хэлэлцээрийг Борис Жонсон сүйтгэсэн. Украиныг энхийн хэлэлцээнд оролцоход Их Британийн ерөнхий сайд асан тэрбээр Байдены засаг захиргааг төлөөлж саад болсон” гэжээ.
Эх сурвалж: THE TELEGRAPH
