Монгол улсын 3х3 сагсан бөмбөгийн шигшээ баг тамирчдыг олон улсад эх орноо төлөөлөх өөдөө тэмүүлэх Монгол буюу “Go Mongolia” элчээр өргөмжилжээ. Ерөнхий сайд Л.Оюун-Эрдэнэ Азийн наадам, Азийн аварга шалгаруулах тэмцээнд тогтмол амжилт үзүүлж байгаа тус тамирчдыг энэ дөрөвдүгээр сарын 17-нд хүлээн авч уулзан батламж гардуулсан байна.
Түүнчлэн Ерөнхий сайдын нэрэмжит мөнгөн шагнал болох 50 сая төгрөгийг тамирчдад олгох шийдвэрийг Засгийн газрын хуралдаанаас гаргасан байна. “Go Mongolia” элч өргөмжлөлийг өмнө нь АНУ-ын Дейтоны их сургуулийн оюутны сагсан бөмбөгийн лигийн тамирчин Ш.Энхийн-Од, Хүннү рок “The Hu” хамтлаг, Монгол улсын гавьяат жүжигчин дуучин Г.Ариунбаатар нар хүртэж байсан.
Нэмж дурдахад, 3х3 сагсан бөмбөгийн баг тамирчид саяхан Хонгконгт болсон Парисын эрх олгох эхний тэмцээнд амжилттай оролцсон ч медалиас мултарсан. Харин олимпын эрх олгох сүүлчийн тэмцээнд манай эрэгтэй, эмэгтэй баг хоёулаа оролцоно. Тус тэмцээн тавдугаар сарын 16-19-нд Унгарын Дебрецен хотод болох юм. Уг тэмцээнд эрэгтэй, эмэгтэй тус бүр 16 баг дөрвөн хэсэгт хуваагдан өрсөлдөх аж. Манай эмэгтэйчүүд “С” хэсэгт Япон, Египет, Испанитай таарчээ. Харин эрэгтэйчүүд Японоос эрхээ авч чадахгүй бол Унгарын тэмцээнд “D” хэсэгт Бельги, Польш, Японтой багтсан байна.
