НҮБ-ын Хүүхдийн сангийн мэргэжилтэн С.Мойлтмаа болон цэргийн албан хаагч монгол залуу Судан улсад болж буй зэвсэгт мөргөлдөөний халуун цэгт гацсан талаар өмнө нь ГХЯ-наас мэдээлж байсан.
Тэгвэл Судан улс дахь “UNICEF Sudan”-д түр томилолтоор ажиллаж байсан “UNICEF Mongolia”-ийн ажилтан С.Мойлтмаа болон манай улсын нэг иргэн зэвсэгт мөргөлдөөнтэй бүс нутгаас аюулгүй, эсэн мэнд эх орондоо иржээ.
Тэднийг 2023.05.01-нд Чингис хааны ОУ-ын нисэх онгоцны буудал дээр гэр бүлийнхэн нь болон НҮБ-ын Монгол дахь Суурин зохицуулагч Тапан Мишра, НҮБ-ын Хүүхдийн сангийн төлөөлөгч Эваристе Коуасси-Комлан нар хүлээн авсан байна.
Мөргөлдөөний бүсээс зөвхөн Монгол Улс гэлтгүй дэлхийн бусад орнууд иргэдээ татан авахаар ажиллаж байгааг албаныхан тодотгосон.
Эхний ээлжид тус бүсэд байсан хоёр монгол иргэнийг Хартум хотоос НҮБ-аас зохион байгуулсан нүүлгэн шилжүүлэх ажиллагаагаар шилжүүлсэн бөгөөд ийнхүү Монгол Улс руу татан авчээ.
Тодруулбал, хоёр монгол иргэн автобусаар Суданы Порт Судан хот руу явсан. Хартум хотоос Порт Судан хот хүртэл 900 орчим км явж иргэд аюулгүй байрлалд буюу Порт Судан хотод очсон юм. Улмаар тус хотоос Монгол руу иржээ.
