Боловсролын зээлийн сангаас 1997 оноос хойш зээл, тэтгэлэг, буцалтгүй тусламж авсан иргэдийн мэдээллийг БШУЯ-аас нийтэд ил зарлаад байгаа билээ. Мөн гэрээний үүргээ биелүүлээгүй 230 суралцагчийн мэдээллийг хуулийн байгууллагад шилжүүлэх, Монгол банкны зээлийн мэдээллийн санд байршуулахаар бэлтгэл ажил хангаж байгааг салбарын сайд дуулгасан. Тэгвэл төрийн сангийн зээлээр суралцсан эдгээр иргэдийн дунд сургалтын төлбөрийн зээлээс чөлөөлөгдөж, дипломоо буцаан авах шаардлага хангасан иргэдийн нэрс хүртэл дурьдагдсан байгааг зарим иргэд цахим орчинд мэдээлсэн байна. Тэгвэл ямар тохиолдолд сургалтын төлбөрийн зээлээс чөлөөлөгдөж дипломыг нь буцаан олгож байгааг Боловсролын Зээлийн сангаас мэдээлсэн байна. Тодруулбал, МУЗГ-ын 2004 оны 22 дугаар тогтоолын дагуу 2003-2004 оны хичээлийн жилээс өмнө Монгол Улсын их, дээд сургууль, коллежийг дипломын болон бакалаврын боловсрол эзэмшсэн төгсөгчдийг сургалтын төлбөрийн зээл, түүний хүүгийн төлбөрөөс бүрэн чөлөөлж дипломыг олгож байгаа ажээ. Мөн МУЗГ-ын 2008 оны 178 дугаар тогтоолын дагуу 2007-2008 оны хичээлийн жилээс өмнө Монгол Улсын их, дээд сургууль, коллежийг дипломын болон бакалаврын боловсрол эзэмшсэн 2.8- аас дээш голч дүнтэй , эзэмшсэн мэргэжлээрээ 2-оос дээш жил үр бүтээлтэй ажиллаж байгаа төгсөгчдийг сургалтын төлбөрийн зээл, түүний хүүгийн төлбөрөөс бүрэн чөлөөлж дипломыг олгож байгаа юм байна. Харин дээрх заалтыг бүрэн хангаагүй төгсөгч сургалтын төлбөрийн зээлээ төлж дипломоо авна гэлээ. Ингэхдээ, бичиг баримтыг бүрдүүлж ирэх юм байна.
Бүрдүүлэх материал:
Нийгмийн даатгалын дэвтэр /эх хувь/
Иргэний үнэмлэх /эх хувь/
Дипломыг өөр хүн авах бол итгэмжлэл хийлгэнэ гэв. Хэрэв та дээрх мэдээллийг дэлгэрэнгүй тодруулах бол Боловсролын Зээлийн сангийн диплом авах талаар мэдээлэл өгөх Утас: 70047009 /2-1 дотуур дугаараар лавлаж асуугаарай.
Эх сурвалж: www.cnews.mn
