Цаг уурын байгууллагаас ойрын 10 хоногийн цаг агаарын урьдчилсан мэдээг танилцууллаа. Ойрын өдрүүдэд зарим нутгаар эрс хүйтэрч, цас орж цасаар шуурах аж.
Тодруулбал, маргааш буюу 5-нд нутгийн зүүн хэсгээр цас орж, цасан шуурга шуурахыг анхааруулж байна. Хур тунадасны тухайд өнөөдөр баруун аймгуудын нутгийн зүүн хэсэг, төв болон говийн аймгуудын ихэнх нутаг, 05-нд төв болон говийн аймгуудын нутгийн зүүн хэсэг, зүүн аймгуудын ихэнх нутаг, 06-нд нутгийн зүүн хэсгээр, 08-нд Алтай, Хангайн уулархаг нутгаар, 10-нд Хэнтийн уулархаг нутгаар цас орж, цасан шуурга шуурна.
Салхи энэ сарын 4, 9, 10-нд говь, тал, хээрийн нутгаар, 11-нд зүүн аймгуудын нутгийн зарим газраар секундэд 12-14 метр хүрч ширүүснэ.
Агаарын температур Увс нуур болон Дархадын хотгор, Завхан голын эх, Идэр, Тэс голын хөндийгөөр шөнөдөө -36…-41 градус, өдөртөө -20…-25 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -28…-33 градус, өдөртөө -15…-20 градус, говийн бүс нутгийн өмнөд хэсгээр шөнөдөө -10…-15 градус, өдөртөө -3…-8 градус, бусад нутгаар шөнөдөө -22…-27 градус, өдөртөө -10…-15 градус хүйтэн байна.
Улаанбаатар хот орчмын 10 хоногийн цаг агаарын урьдчилсан төлөвийн хувьд, 4-5-нд цас орно. Бусад хугацаанд цас орохгүй.
Агаарын температур шөнөдөө Яармаг-Сонгины орчмоор -29…-34 градус, бусад хэсгээр -21…-26 градус, өдөртөө бүх хэсгээр -10…-15 градус хүйтэн байна.
