Өмнөд Солонгосын нийслэл Сөүл хотын захиргааны байрны ойролцоох автозамын уулзвар дээр өчигдөр орой 21:30 цагийн үед зам тээврийн ноцтой осол гарлаа. 68 настай эрэгтэй замын хөдөлгөөн зогсохыг гарцан дээр хүлээж байсан явган зорчигчдыг дайрсан байна.
Уг ослын улмаас есөн хүн нас баржээ. Нас барсан есөн хүний зургаа нь ослын газарт амиа алдсан бол гурав нь эмнэлэгт хүргэгдсэн ч ослын үеэр авсан гэмтэл шархаа дийлэлгүй амь эрсэдсэн байна. Мөн ослын улмаас дөрвөн хүн хүндээр бэртэж эмнэлэгт хүргэгджээ.
Цагдаа нар уг хэргийг үйлдсэн 68 настай эрэгтэйг баривчлан саатуулж байцаалт авч хэргийн мөрдөн шалгах ажлыг үргэлжлүүлж байна. Урьдчилсан байдлаар уг эрэгтэй санаатайгаар осол гаргаагүй бөгөөд машин нь гэнэт хурдалж зогсож чадаагүй гэсэн тайлбар өгчээ. Уг жолооч явган зорчигчдыг мөргөж дайрахаасаа өмнө автозам дээр байсан хоёр ч тээврийн хэрэгслийг мөргөсөн байна.
Сөүлийн зарим хэвлэлүүдэд мэдээлснээр осол хийсэн эрэгтэй урсгал сөрөн хөдөлгөөнд оролцжээ. Өмнөд Солонгост төв суурин газрын замд дээд тал нь 50 км/цагийн хурдтай явахыг зөвшөөрдөг. Харин иргэдийн орон сууцны хороололд автомашины хурдыг 30 км/цагаас хэтрүүлэхгүй байхаар хуулинд заасан байдаг.
Сүүлийн жилүүдэд тус улсад зам тээврийн ослоос болж хүний амь нас хохирох тохиолдол буурсан үзүүлэлттэй гарсныг Эдийн засгийн хамтын ажиллагаа, хөгжлийн байгууллага саяхан мэдээлсэн. Гэхдээ 2022 оны судалгаагаар автозам дээр амиа алдсан хүмүүсийн 35 хувь нь явган зорчигчид байжээ.
Сөүл хотын дарга Ө Сэ Хун ослын газарт ажиллаж, гүн эмгэнэл илэрхийлсэн байна. Мөн хохирогчдод яаралтай тусламж үзүүлж, ослын шалтгааныг аль болох хурдан тогтоох үүргийг холбогдох ажилтнуудад өгчээ.
