УИХ-ын гишүүн С.Зориг асны амь насыг зэрлэгээр хөнөөсөн гэх хэргээр ял сонсож, хорих ангид долоон жил орчим мөрдөн шалгах ажиллагаа, эрүүдэн шүүлтийн дор зовж байсан Монгол Улсын иргэн Т.Чимгээ, Б.Содномдаржаа нарын хэргийг хуулийн байгууллага хэрэгсэхгүй болгож шийдвэрлэжээ. Үүнтэй холбогдуулан Хууль зүй, дотоод хэргийн сайд Х.Нямбаатар өнөөдөр буюу 2023.04.19-нд сэтгүүлчдэд дараах мэдээллийг өгсөн юм.
Х.Нямбаатар сайд “С.Зориг агсны хэрэгт буруутгагдан шалгагдаж байсан Ц.Содномдаржаа, Т.Чимгээ нарыг шүүхийн шийдвэрийн дагуу ялаа эдэлж байх үед мөрдөн шалгаж байсан нэр бүхий албан тушаалтнууд эрүүдэн шүүсэн гэх хэрэг үүсгэж, мөрдөн шалгах ажиллагаа явуулж, тухайн хоёр иргэнийг эрүүдэн шүүсэн болох нь тогтоогдсон. Энэ нь шинээр илэрсэн нөхцөл учраас хэргийг дахин хянаж үзэх саналаа прокуророос шүүхэд хүргүүлсэн байдаг. Улсын Дээд шүүх уг асуудлыг судалж үзээд өмнө нь гаргасан гурван шатны шүүхийн шийдвэрийг хүчингүй болгож, мөрдөн байцаалтад буцаах шийдвэр гаргасан. Мөрдөн байцаалт урт хугацаанд үргэлжилсэн.
Өнөөдөр Нийслэлийн прокурорын газраас мөрдөгчийн ирүүлсэн саналыг үндэслэн Т.Чимгээ, Б.Содномдаржаа, Ц. Амгаланбаатар нарт холбогдуулан 830142 дугаартай эрүүгийн хэрэг дээр яллагдагчаар татсан тогтоолыг хүчингүй болгож шийдвэрлэж байна.
