2023 оны дөрөвдүгээр сарын 19-нд НПГ-аас Төр, нийгмийн нэрт зүтгэлтэн С.Зориг агсны амь насыг хөнөөсөн хэргээр ял сонсож, хэрэг нь задарч батлан даалтад гараад байсан Т.Чимгээ, Б.Содномдаржаа нарын хэргийг хэрэгсэхгүй болгосон шийдвэрийг гаргасан билээ. Үүнтэй холбоотойгоор зарим хүмүүс цахим орчинд байр сууриа илэрхийлсээр байна. Өөрөөр хэлбэл, удтал чимээгүй байсан, энэ хэргийн тухай хамаагүй ярихаас эмээдэг байсан хүмүүс өөр өөрийнхөө өнцгөөс дуугарч эхлээд байна. Тухайлбал,
Монголын ардчилсан хувьсгалын анхны зүтгэлтнүүдийн нэг, Хотын дарга асан Э.Бат-Үүл:
–Зоригийг бүрэлгэсэн хэрэгт,намайг санаатайгаар гүтгэн холбогдуулсан олон жилийн бузар улстөрөөс, хохиролоо 25 тэрбумаар үнэлж хуулийн дагуу нэхэмжлэнэ! Би ингэх эрхтэй!!!
-Амь насны хэрэг нь Нямдорж тэргүүтэй МАН-ын цадиггүй улстөрийн тоглоом болж буйд,25 жилийн турш Зоригийн өмнөөс гол харлаж явахдаа түүний нэрэмжит Академи байгуулна гэж мөрөөдөж ирсэн.Хохиролоо олж аваад мөр-өө хэрэгжүүлэх өдөр ирнэ ээ!
ТЕГ-ын дарга асан Б.Хурц:
–
“Намайг ТЕГ-ын даргаар очхоос өмнө ТЕГ-ын даргаар Б.Ариунсан, УЕП-оор Д.Дорлигжавыг байх үед шалгаж эхлэсэн асуудал. Г.Эрдэнэбат прокурор бид хоёр үргэлжлүүлж шалгасан гэсэн үг. Үнэнийг хэлэхэд нууцын зэрэглэлээс гаргаж өгдөггүй. Би олон ч удаа хүсэлт тавьсан. Шоронд хэвтэж байхдаа хүртэл эхнэр хүүхдээрээ дамжуулан “нууцын зэрэглэлээс гаргаж өг” гэж тухайн үеийн ҮАБЗ-ийн гурван даргад хүргүүлж байлаа. Хурц нарын хэрэг гээд л ярьдаг. Үүнийгээ бас нууцын зэрэглэлээс гаргачих. Тэгэхээр бүх зүйл тодорхой болно. Бидэнд яаж ял тулгаж байсан нь. Одоо хөөс арилж байна. Хатуухан хэлчихье. Энэ бол хоёр хоригдлын хооронд хэргээ яриад зодолдоод байгаа асуудал шүү дээ. Мөн үү. Ц.Нямдоржийг сайд байхад эрүүдэн шүүлт жинхэнэ аюултай байсан. Өчигдөр Ц.Нямдорж өөрөө гарч ирж байгаа нь улстөрийн хэрэг. Улстөрийн хэрэг гэдэг нь бүр тодорхой болчихлоо.
Тэтгэвэрт гэртээ хэвтэж байсан өвгөн гарч ирээд шоу хийгээд л. Болоогүй. Магадгүй бүх юмны эхлэл ч байж магадгүй.
-2017 оны үес Ж.Батзандан, Ц.Нямдорж хоёр ээлжилж гарч ирээд захиалагчийг зарлана гэцгээсэн биз дээ. Тэр бичлэгүүд байгаа. Өнөөдөр хэдэн он бэ. Энэ асуултыг тэднээс асуух ёстой. Тэд нар захиалагчийг яаж мэдээд байгаа юм.
Анхааралтай хараарай. Биднээс хойш ажлын хэсгийг тараачихсан. Миний сонссоноор дахиад л тараагаад байна. Ц.Нямдоржийн арга. Чиглэл өгч заадаг хүн шүү дээ. Ц.Нямдорж бол аюултай тоглогч. Би хардаж байгаа. Өнөөдөр МАН-ын удирдлагуудыг шантаажилж, энэ хэргийг хэрэгсэхгүй болгох зам руу түлхсэн байх гэж хардаж байна.
“Зариг.мн” сайтын эрхлэгч, сэтгүүлч Н.Өнөрцэцэг
-С.Зоригийн хэрэг одоо хэзээ ч илрэхгүй болсон уу? Гүйцэтгэгчийг нь шийтгээд, захиалагчруу дөхтөл ийм юм болчихлоо. Захиалагчаар 8 хүнийг яллагдагчаар татсан гэдэг. Одоо тэгээд ахиад намууд С.Зоригийн хэргийг илрүүлнэ гэж шоудах байхдаа. Үнэхээр харамсалтай.- -С.Зоригийн хэрэг дээр маш сонин зүйлүүд өрнөөд байгаа харагдах юм. Тухайн үед нь сэтгүүлчээр ажиллаж байсан ч болоосой гэж бодох юм даа. Даанч дээ нээрэн…хүний үхлээр сонгуульдаж, улс төр хийж, ингэж тамлах гэж…
Монгол Улсын гавьяат жүжигчин Д.Сосорбарам: 
-Талийгаач С.Зоригоор аль, аль нь улс төр хийж байна шүү дээ. МАН-ынхан ч илүүцтэй хийх юм. АН ч нэг л их хайртай хүн байсан гээд цэцэг навч өргөөд сүйд болох юм. Гол нь бодитой хандлага, саруул бодол, эрүүл сэтгэлгээ гээч юм, хий хөөсөрсөн авир араншингаас болоод бүрхэгдээд байгаа явдал л миний дотоод ертөнцийг их эмзэглүүлдэг юм.
Талийгаачийн мэндэлсэн өдрөөр нь ташлуулаад зориуд юм шиг улс төр хийж байна гэж л үзэж байна. Сонгууль ойртчихсон юм байна. 2024 оны хоймрыг сөхөж харж байгаа юм байна, эд нар. Дахиад л өнөө л аллагад өртсөн, чухам ямар аллага нь мэдэгдэхгүй, түүнийгээ нотлохгүй байгаа шүү дээ. Улс төрийн юм уу, ахуйн юм уу тодорхойгүй. Би бол энэ хэргийг ахуйн аллага юм байна лээ гэж харж байгаа. Өнөөдөр хэрэгсэхгүй болж байгаа хүмүүс нь алуурчин. Би хуулийн хүн биш, криминалист биш, тэр хүмүүсийг танихгүй. Гэхдээ миний нэг анзаарсан зүйл бол явж байгаа хандлагыг харахад тэр нөхөд энэ хэргийг үйлдсэн гэж үзэж байгаа. Үүнийг би хэнээс ч айхгүй хэлнэ. Тэр нөхөд бол алуурчид мөн байна гэж харсан. Учир нь Эрдэнэбат прокурор нэлээд эрт Мөнхбаясгалантай “Цензургүй яриа”-гаар Содномдаржаа гэдэг хүний гэртээ агсам тавьж байгаа, Би Обама биш, би Путин биш гэхдээ та нарыг яана ч билээ, тийм нэг бичлэгийг үзүүлсэн.
Түүн дээр бас нэг зүйл харагдсан нь Чимгээ гэж бүсгүй “Энэ хэргийг та үйлдсэн юм биш үү, үүнийг уншаад та гарын үсэг зур” гэхэд хариуд нь “Нотолгоо чинь хаана байгаа юм бэ” гэж хэлээд жуумалзаж байгаа юм.
-Ц.Нямдорж гар хөлүүдээрээ устгуулчихаагүй бичлэг нь интернэтэд байх ёстой. Би сэтгэл зүй анзаарч, дүр урлахуй дээр ажилладаг хүний хувьд харахад ямар айхавтар, хэргээс бултах гэсэн, хийсэн үйлдлээ эвтэйхэн далдлах гэсэн башир аргатай хүүхэн бэ гэж харсан.
Хэрэв Чимгээ гэдэг бүсгүй хүн алаагүй, ийм аймшигтай хэрэгт оролцоогүй бол орилоод чарлаад уйлаад сүйд болно. Бараг ухаан алдаад унана, аюул болно, тэгээгүй. Мань эр нэлээд хашир суучихсан, догширчихсон, айхтар юманд орчихсон, тэрнээс гарах гарцаа хайгаад сурчихсан байртай харагдсан. Отгонбаатар гээд өөрсдийнхөө хам хэрэгтнийг Эрдэнэтэд очоод гэр бүлтэй нь шатаачихсан шүү дээ.
-Яасан унхиагүй улс юм бэ, яасан унхиагүй тагнуул юм бэ, яасан арчаагүй цагдаа сэргийлэх шүүх юм бэ. Ц.Нямдорж шүүх ялзарчихсан байсан гэж гайхуулаад л. Тэгвэл хэн тэр үед Хууль зүйн сайд байсан юм бэ. Энэ хүн 33 жил Монголын төрд зайдалж байгаа. Би бол алуурчидтай нийлж Ц.Нямдорж өөрөө асар их гэмт үйлдэл үйлдсэн хүн байна, түүнийгээ далдлахын тулд ийм улс төр хийдэг юм байна, эргэн улс төрд очихын тулд ийм хачин авир гаргадаг юм байна гэж харсан. Энэ хүнд их юм нуугдаж байгаа юм байна. Энэ хүн захиалагчийг ч мэддэг юм байна. Гэхдээ улс төрийн захиалга биш юм байна гэж харсан шүү.
