Катарын нийслэл Доха хотод энэ сарын 7-14-ны өдрүүдэд жүдогийн насанд хүрэгчдийн Дэлхийн аварга шалгаруулах тэмцээн болж байгаа билээ. Уг тэмцээнд оролцохоор манай улсын жудочид энэ сарын 8-нд хүлгийн жолоо залсан. Тэгвэл ДАШТ-ий хүрэл медальт, үндэсний шигшээ баг, “Сүлд” спорт хорооны тамирчин ОУХМ Лхагватогоогийн Энхрийлэн Жүдогийн дэлхийн аваргын 57 кг-ын жинд хүрэл медалийн эзэн болсон баярт мэдээг дуулгаад байна.
Тэрээр Ташкентэд ялж байсан БНСУ-ын 20 настай жүдоч Хүх Мимитэй медальтай үлдэх үү, эс үлдэх үү гэдгээ шийдэх 10 гаруй минут үргэлжилсэн хүч шавхсан барилдаанд торгуулиар ялж, амжилтаа бататган дахин шагналын тавцанд зогссон байна.
Ингэснээр жудогийн тамирчин Л.Энхрийлэн Монголын цагаан өмсгөлтнүүдээс ДАШТ-ээс хоёр болон түүнээс дээш медаль хүртсэн зургаа дахь (Түүнээс өмнө нь Х.Цагаанбаатар, Д.Сумъяа, М.Уранцэцэг, Г.Болдбаатар, А.Басхүү энэхүү амжилтыг үзүүлсэн) тамирчин болж байна.
2022 оны Улаанбаатарын их дуулгын аварга Л.Энхрийлэн энэ жил 24 нас хүрч буй залуу, туршлагатай, эрэмгий тамирчин бүсгүй юм.
