“Тwitter” хэрэглэгчдэд бүтээсэн контентоосоо төлбөр авах боломж олгож байгааг Илон Маск мэдээллээ. Үүнд урт текст, хэдэн цагийн урттай видео зэрэг бүх төрлийн контент багтах юм байна. Мөн ирэх 12 сарын хугацаанд тэрээр хэрэглэгчдийнхээ олсон мөнгөнөөс ямар нэгэн хураамж авахгүй гэжээ
Хэрэглэгчид “App Store”-ийн хураамжаа төлсний дараа дагагч нараас олох орлогынхоо 70-аас доошгүй хувийг хадгалах боломжтой гэж Илон Маск дурдсан байна.
Хэдийгээр 12 сарын хугацаанд хэрэглэгчдийнхээ орлогоос ямар нэг хураамж авахгүй ч гэсэн энэ нь ирээдүйд контентоос илүү их мөнгө олох арга байж болохыг эдийн засгийн шинжээчид таамаглаж байна.
Учир нь “X Corp”-ийн охин компани “Twitter” сүүлийн үед платформоороо дамжуулан мөнгө олох оролдлогыг идэвхтэй хийж байна. Орлогынх нь 80 гаруй хувийг бүрдүүлдэг тус компанийн зар сурталчилгаа сүүлийн үед огцом буураад байгаа аж.
Түүнчлэн “Twitter Blue” хэмээх шинэ системээр орлогоо нэмэгдүүлэхийг хичээж буй ч сарын дундаж хэрэглэгчдийн дөнгөж нэг хувь нь л энэхүү үйлчилгээнд бүртгүүлсэн байна.
