Нийслэлийн Прокурорын газрын хяналтын прокуророос яллагдагч С.Батдөлд авсан “цагдан хорих” таслан сэргийлэх арга хэмжээний хугацаа сунгуулах тухай саналыг шүүхэд хүргүүлжээ.
Баянгол дүүргийн Эрүүгийн хэргийн анхан шатны шүүх уг саналыг өчигдөр буюу 2023 оны тавдугаар сарын 8-ны өдөр хянан хэлэлцээд Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2 дахь хэсэгт “Хэргийн ээдрээ төвөгтэй байдлыг харгалзан яллагдагчийг цаашид цагдан хорих…..” гэсэн заалтыг үндэслэн яллагдагч С.Батдөлд авсан “цагдан хорих” таслан сэргийлэх арга хэмжээний хугацааг нэг сараар сунгаж шийдвэрлэсэн байна.
Энэ хэргийн талаар Хууль зүй, дотоод хэргийн сайд Х.Нямбаатар хэлэхдээ“2023 оны нэгдүгээр сарын 5-6-нд шилжих шөнө Эрүүгийн цагдаагийн газраас хойшлуулшгүй ажиллагаа явуулж, Улаанбаатар төмөр замын албан тушаалтан Б болон түүний хамаарал бүхий хүмүүсийн гэрээс нийт 7.3 тэрбум төгрөгийг хураан авч иргэн Б-г 48 цагийн хугацаагаар баривчилсан. Мөн 4 тэрбум гаруй төгрөгийн үл хөдлөх хөрөнгийг үндэслэлгүйгээр олж авсан гэдэг асуудлаар мөрдөн шалгах ажиллагаа үргэлжилж байна” хэмээн мэдээлж байв.
Харин прокурорын байгууллагаас түүнийг цагдан хорих саналаа шүүхэд хүргүүлснээр 2023 оны нэгдүгээр сарын 9-нөөс хойш цагдан хорьж байна.
Гэрээс нь 7.3 тэрбум төгрөг олдсон гэх С.Батдөл нь Улаанбаатар өртөөний орлогч даргаар ажиллаж байсан бөгөөд 2021 оноос Улаанбаатар төмөр замын Тээвэр зохион байгуулалтын албаны орлогч болон дэвшжээ. Тэрээр Дархан- Уул аймгийн харьяат бөгөөд эхнэр, нэг хүүхэдтэй. Өмнө нь хулгайн хэргээр ял шийтгүүлж байсан удаатай гэдгийг хэвлэлийнхэн мэдээлж байсан билээ.
