Америк, орос иргэншилтэй, 33 настай баллетчин Ксения Карелина Украинд 51 ам.доллар хандивласныхаа төлөө бүх насаараа хоригдож магадгүй байна. Тодруулбал, ОХУ-ын дотоодын тагнуулын гол байгууллага болох Холбооны аюулгүй байдлын алба эмэгтэйг эх орноосоо урвасан хэргээр баривчилсан тухай мэдээллээ.
Холбооны аюулгүй байдлын албанаас мэдэгдэхдээ баллетчин эмэгтэйг 2022 оны хоёрдугаар сараас хойш Украины ашиг сонирхлын төлөө идэвхтэйгээр мөнгө цуглуулж, эм, техник, зэвсэг, сум худалдаж авахад нь тусалсан гэжээ. Мөн АНУ-д зохион байгуулагдсан Украиныг дэмжсэн үйл ажиллагаануудад удаа дараалан оролцсон гэлээ. Тэрбээр ойролцоогоор 51 ам.долларыг “Украинтай хамт” гэх ашгийн бус байгууллагын дансанд шилжүүлжээ.
АНУ-ын Төрийн департмент болон Цагаан ордны зүгээс Ксения Карелинагийн хэргийг мэдэж байгаа гэдгээ илэрхийлээд давхар иргэншилтэй иргэдэд анхааруулга хүргүүлсэн байна.
“ОХУ давхар иргэншлийг хүлээн зөвшөөрдөггүй. Ийм хүмүүсээ юун түрүүнд Оросын иргэн гэж үздэг” гэж АНУ-ын Төрийн департамент мэдэгдлээ.
Свердловск мужийн шүүхийн хэвлэлийн албанаас мэдээлснээр баллетчин эмэгтэйн шүүх хурал Мягмар гаригт болох байсан ч өмгөөлөгч ирээгүйн улмаас хоёрдугаар сарын 29 хүртэл хойшилжээ.
Эх сурвалж: FOX NEWS
