2023 оны зургаадугаар сарын 3-ны Бямба гарагт Улаанбаатар хотод “Автомашингүй өдөр”-ийг тэмдэглэнэ. Энэ үеэр олон улсын марафон гүйлт зохион байгуулагдах бөгөөд марафон гүйлтийн бүртгэл албан ёсоор эхэлж байгааг өнөөдөр албаныхан мэдээллээ.
Мөн ирэх сарын 3-нд зах худалдааны төвүүд амрах, нийтийн тээврийн автобусны маршрутын өөрчлөлтийн талаар өмнөх долоо хоногт нь эргэн мэдээлэх болно гэдгийг зохион байгуулагчид дуулгаж байна.
“Улаанбаатар марафон” энэ жил цар хүрээгээ тэлж, иргэдийг бүтэн өдрийн турш нийслэлийн төв талбайд цагийг зөв боловсонөнгөрүүлэхэд зориулсан өдөрлөг болон өргөжиж байгааг онцолж байлаа.
Олны дунд автомашингүй өдөр гэж нэрлэдэг “Улаанбаатар марафон”-д иргэдийг гэр бүл, найз нөхөд, хамт олонтойгоо оролцоход зориулан таатай орчныг бүрдүүлж, бүтэн өдрийн турш урлагийн тоглолт, эрүүл амьдралын хэв маягийг сурталчилсан худалдаа, үйлчилгээ зэрэг олон төрлийн үйлчилгээг зохион байгуулахаар төлөвлөжээ.
“Улаанбаатар марафон-2023” нь өмнөх жилүүдтэй адил 1,5-аас эхлээд 5, 10, 21, 42 км-ийн гүйлтийн ангилалтай байна. Хамгийн ойрын зай буюу 1,5 км-ийн гүйлтэд гэр бүлийн болон хөгжлийн бэрхшээлтэй иргэд оролцох юм байна.
Марафоны маршрутын дагуу явуулын DJ сет, хүүхэд багачуудад зориулсан циркийн үзүүлбэр, уран нугаралт, бодибилдингийн шоу, нийтийг хамарсан бүжиг, дасгалын үзүүлбэртэй. Мөн гүйлтийн зам дагуу зам болон км-ийн тэмдэглэгээ, сайн дурынхны ус тараах цэг, барианы газарт зураг авахуулах хэсэг зэргийг байршуулах юм байна.
“Улаанбаатар марафон-2023” өдөрлөгийг НЗДТГ, Нийслэлийн биеийн тамир, спортын газар, “Хай Пэймэнт Солюшнс” ХХК, Монголын хөнгөн атлетикийн холбоо зохион байгуулж байгаа бөгөөд гүйх хүсэлтэй иргэдийг цахимаар буюу https//ubmarafon.hipay.mn сайтаар, мөн Hipay апп-аар бүртгэж байна.
Марафонд оролцогчдод амжилттай оролцсоныг батлах сертификат олгох аж.
