Дэлхийн олон оронд хот суурин газар руу чиглэсэн шилжилт хөдөлгөөний урсгал тасралтгүй нэмэгдсээр байна. Тиймээс улс орнууд хот төлөвлөлтөө зөв зохион байгуулах, том хотынхоо төвлөрлийг задлах үүднээс суурьшлын бүсээ тэлж, агаарын бохирдол, түгжрэл тойрсон асуудлуудаа оновчтой зөв шийдсээр байна.
Гэтэл Улаанбаатар хотын төвлөрөл, түгжрэлийг шийдэх томоохон ажлууд сунжирсаар, өнөөдөр хотын хүн ам 1.6 саяд хүрээд байна. Бүртгэлгүй болон хот, хөдөө хоёрын дунд ирэн очин байдаг хүмүүсийн тоог нэмбэл Улаанбаатар хот 1.7 сая хүн амтай гэдгийг зарим тоон мэдээлэлд дурддаг. Үүнээс харахад Улаанбаатар хотын хүн ам жилд ёс юм шиг, 70-80 мянгаар механикаар өсөж байгааг хэлэх нь илүүц биз.
Дээр нь автомашины хэрэглээ жилд 80 мянгаар нэмэгддэг гээд тооцвол өнөөдөр манай хотод 1.7 сая иргэний ажил амьдралыг даагаад явах нийгэм, эдийн засаг, дэд бүтцийн асуудал улам бүр хүндэрсээр байгаа юм. Энэ нь эргээд иргэдийн ажил амьдрал, сэтгэл санаанд халгаатай болж эхэлж байгааг түгжрэлд гацсан их хотын иргэд өдөр бүр хэлж байна.
Иймд энэ асуудлыг дорвитой өөрчлөх хамгийн чухал зохицуулалт нь дагуул хотуудыг хөгжүүлэх бөгөөд энэ асуудал нь хотын даргын асуудал бус монгол төрийн бодлого байх ёстой гэдгийг Улаанбаатар хотод ажиллаж амьдарч буй залуусын байгууллагууд онцолж байна.
